Yaman janubida Birlashgan Millatlar Tashkilotining olti nafar xodimi noma’lum jangarilar tomonidan o‘g‘irlab ketildi. Bu haqda manbalarga tayanib, Yaman Press Agency mahalliy matbuot agentligi (YPA) xabar berdi.
“Mahalliy manbalarga ko‘ra, BMTning olti xodimi, jumladan, bir nafar bolgariyalik va besh nafar yamanlik noma’lum jangarilar tomonidan Abyan provinsiyasida o‘g‘irlab ketilgan”, — deyiladi agentlik xabarida.
BMT vakillari Abyandagi gumanitar vaziyatni o‘rganish uchun ish safari bilan provinsiyada bo‘lgan. Manbalariga ko‘ra, jangarilar BMT xodimlarini avtomashinada noma’lum tomonga olib ketgan.
Yamandagi BMT gumanitar yordam koordinatorining kommunikatsiyalar bo‘yicha katta maslahatchisi Rassel Giki tashkilot xodimlari o‘z ishlarini yakunlab, Adan shahriga ketayotganda o‘g‘irlab ketilganini aytdi, deb yozadi Sinxua.
“Birlashgan Millatlar Tashkiloti ularning (BMT xodimlari) ozod etilishini ta’minlash uchun rasmiylar bilan yaqin aloqada”, — degan Giki.
Hozircha hech qaysi qurolli guruh ushbu o‘g‘irlik uchun javobgarlikni o‘z zimmasiga olmagan.
YPA eslatishicha, 2021-yili “Xalqaro qutqaruv qo‘mitasi” (International Rescue Committee) nodavlat tashkiloti Yamanning Abyan provinsiyasida tashkilotning ikki mashinasi noma’lum jangarilar tomonidan talon-taroj qilinganidan so‘ng hududda gumanitar faoliyatini to‘xtatganini e’lon qilgandi.
Avvalroq Kongoda harbiy tribunal 2017-yilning mart oyida BMTning ikki xodimini o‘ldirganlikda ayblangan 51 kishini o‘limga hukm qilgandi. 2017-yilda BMT ekspertlari — Shvetsiya fuqarosi Zayda Katalan va AQSh fuqarosi Maykl Sharp xizmat faoliyati vaqtida bedarak yo‘qolgan. Ikki hafta o‘tgach, ularning jasadi topilgan.
Izoh (0)