КХДР шимоли-шарқидаги Пхунгери ядро полигони жойлашган Кильжу округида 3,1 магнитудали зилзила юз берди. Бу ҳақда Жанубий Корея метеорология бошқармасига таяниб, «ТАСС» хабар берди.
Хабарга кўра, ер силкинишлари 10:35 да (Тошкент вақти билан 06:35) 17 километр чуқурликда қайд этилган. Таъкидланишича, зилзила ядровий қурилманинг портлаши эмас, балки табиий тектоник жараёнлар натижасида юзага келган.
Жанубий Корея метеорология бошқармаси маълумотларига кўра, бу ҳудудда 1978 йилдан бери 2,0 ва ундан юқори магнитудали 25 та зилзила содир бўлган. Улардан энг кучлиси — 3,2 магнитудали зилзила 2017 йилнинг 23 сентябрида қайд этилган.
2006—2017 йилларда КХДР полигонида жами олтита ядровий портлаш амалга оширилган. Сейсмик станцияларнинг маълумотларига кўра, улардан биринчиси Паэктусан вулқони остида, қолганлари Мантапсан тоғи остидаги туннелларда амалга оширилган. 2018 йилда полигон КХДР расмийларининг хайрихоҳлиги билан ёпилган. Кейинроқ Америка разведкаси полигон ёпилганига шубҳа билдирган. Унга кўра, ядровий майдон исталган вақтда фойдаланишга топширилиши мумкин
Изоҳ (0)