Россия Либерал-демократик партияси (РЛДП) матбуот хизмати омикрон билан касалхонага ётқизилган партия етакчиси Владимир Жириновскийнинг атрофдагилар – сафдошлари, яқин қариндошлари ва шифокорларни таний олмаётгани ҳақидаги маълумотни рад этди.
«РЛДП аноним манбаларнинг баёнотини қатъиян рад этади», — дейилади хабарда.
Жириновский партияси аъзоларининг фикрича, баъзи оммавий ахборот воситалари сиёсатчининг соғлиғига оид бўрттирилган маълумотларни тарқатиб, шов-шув кўтаришга уринмоқда. Қайд этилишича, партия етакчиси аҳволига қарамай фаолиятини давом эттирмоқда, ОАВда нималар ёзилаётганини ҳар куни кузатиб бормоқда, шунингдек, телефон орқали керакли кўрсатмаларни бериб турибди.
«Тез орада у тўлақонли ишга қайтиши мумкин», — дея ишонч билдирди матбуот хизмати.
Жириновский 9 февраль куни омикрон штамми билан касаллангани сабаб марказий клиник шифохонага ётқизилган эди. Сиёсатчи коронавирусга чалинганини икки ҳафта давомида сир тутган, чунки у бу ҳақдаги маълумотлар вакцинация тарафдорлари орасида ноўрин шубҳаларни келтириб чиқаришидан хавотир олган.
Аввалроқ Либерал-демократик партия аъзоси ва партия раисининг маслаҳатчиси Сергей Жигарев сиёсатчининг кўрсатмалари бажарилаётганини, чунки сафдошлари доим унинг ёнида эканини айтганди. Либерал-демократик партиянинг Олий партия мактаби куратори Андрей Андрейченконинг таъкидлашича, журналистлар Жириновскийнинг аҳволи оғирлиги ҳақидаги миш-мишларни атай авж олдирмоқда.
Изоҳ (0)