Rossiya Liberal-demokratik partiyasi (RLDP) matbuot xizmati omikron bilan kasalxonaga yotqizilgan partiya yetakchisi Vladimir Jirinovskiyning atrofdagilar – safdoshlari, yaqin qarindoshlari va shifokorlarni taniy olmayotgani haqidagi ma’lumotni rad etdi.
“RLDP anonim manbalarning bayonotini qat’iyan rad etadi”, — deyiladi xabarda.
Jirinovskiy partiyasi a’zolarining fikricha, ba’zi ommaviy axborot vositalari siyosatchining sog‘lig‘iga oid bo‘rttirilgan ma’lumotlarni tarqatib, shov-shuv ko‘tarishga urinmoqda. Qayd etilishicha, partiya yetakchisi ahvoliga qaramay faoliyatini davom ettirmoqda, OAVda nimalar yozilayotganini har kuni kuzatib bormoqda, shuningdek, telefon orqali kerakli ko‘rsatmalarni berib turibdi.
“Tez orada u to‘laqonli ishga qaytishi mumkin”, — deya ishonch bildirdi matbuot xizmati.
Jirinovskiy 9-fevral kuni omikron shtammi bilan kasallangani sabab markaziy klinik shifoxonaga yotqizilgan edi. Siyosatchi koronavirusga chalinganini ikki hafta davomida sir tutgan, chunki u bu haqdagi ma’lumotlar vaksinatsiya tarafdorlari orasida noo‘rin shubhalarni keltirib chiqarishidan xavotir olgan.
Avvalroq Liberal-demokratik partiya a’zosi va partiya raisining maslahatchisi Sergey Jigarev siyosatchining ko‘rsatmalari bajarilayotganini, chunki safdoshlari doim uning yonida ekanini aytgandi. Liberal-demokratik partiyaning Oliy partiya maktabi kuratori Andrey Andreychenkoning ta’kidlashicha, jurnalistlar Jirinovskiyning ahvoli og‘irligi haqidagi mish-mishlarni atay avj oldirmoqda.
Izoh (0)