Шамалер шаҳрида жойлашган Франция банки босмахонаси ҳудудида йирик ёнғин содир бўлди, деб хабар беради Метро.
Ижтимоий тармоқларда тарқалган кадрларда мамлакат Марказий банкининг банкноталар ишлаб чиқарувчи фабрикасидан қуюқ тутун чиқаётганини кўриш мумкин. Маълум қилинишича, ёнғин полиграфия лабораториясида юзага келган.
Маҳаллий ОАВларнинг маълумотларига кўра, ёнғин оқибатида ҳеч ким ҳалок бўлмаган, бироқ 34 киши енгил жароҳат билан Клермон-Феррана шифохонасига етказилган. Бинода заводнинг жами 387 киши бўлган ва улар воқеа жойидан эвакуация қилинган.
Ҳодиса жойига етиб келган ўт ўчирувчилар ёнғинни «жуда кучли» дея таснифлаган, бироқ қутқарувчилар томонидан зудлик билан кўрилган чора-тадбирлар натижасида оловнинг тарқалиши камайган. Ёнғинни ўчиришга 60 нафар ўт ўчирувчи ва 24 та махсус техникалар жалб этилган.
Фабрика директори Пьер-Ив Буассинонинг маълум қилишича, ёнғин ишлаб чиқаришга шубҳасиз таъсир кўрсатади, бироқ у қадар катта кўламда эмас. «Шубҳасиз бу ишлаб чиқаришга таъсир кўрсатади, бироқ биз хавотирда эмасмиз, чунки умумий ишлаб чиқариш воситаларига зарар етмаган. Зарур чораларни кўриш керак. Бундан ҳам ёмони бўлиши мумкин эди», — дейди у.
Ҳозирча ёнғин нима сабабдан юзага келгани аниқланмаган, аммо расмийларнинг таъкидлашича, ҳолат бўйича, албатта, тергов ўтказилади.
Маълумотларга кўра, Шамеледаги босмахона Европа Иттифоқидаги банкноталарнинг бешдан бир қисмини ишлаб чиқаради. Бинода йилига 2,5 миллиард банкнота босилади.
Изоҳ (0)