Гурбангули Бердимуҳамедов COVID-19 га тест топширди ва Ашхободда Стоматология ҳамда педиатрия марказларини қуриш ҳақида топшириқ берди

8 февраль куни ўтказилган ҳукумат йиғилишида Туркманистон президенти Гурбангули Бердмуҳамедов Хитойга қилган сафаридан кейин у ва делегациянинг бошқа аъзолари уч кун карантинда ўтиришгани, карантин меъёрларига амал қилинганини таъкидлади, деб ёзмоқда «Хроника Туркменистана».

«Коронавирусга топширган тест натижалари ҳаммаси яхши эканлигини кўрсатди», – дея Туркманистон давлат раҳбарининг сўзларидан иқтибос келтиради «Туркменистан Сегодня» ахборот агентлиги. Эслатиб ўтамиз, Туркманистонда бутун дунёда пандемия бошланганидан бери коронавирус билан касалланиш ҳолати расман қайд этилмаган.

Йиғилиш давомида Бердимуҳамедов Соғлиқни сақлаш ва тиббиёт саноати вазири Нурмуҳаммад Амманнепесовни Туркманистон юқумли касалликлар тарқалишини олдини олиш бўйича фавқулодда комиссиянинг вақтинча раҳбари лавозимидан озод қилди ва унинг бу борадаги ваколатларини илм-фан, маориф, соғлиқни сақлаш ва спорт комплекси раҳбари, бош вазир ўринбосари Сапардурди Тойлиевга қайтарди.

Туркманистон президенти мамлакатда санитар-профилактик тадбирларни давом эттириш ҳақида топшириқ берди ва ХХР раҳбари Си Цзиньпин билан музокаралар якунига кўра Хитой томони Туркманистонга коронавирусга қарши 5 миллион доза тақдим қилганини билдирди.

Шунингдек, Бердимуҳамедов Ашхободда яна бир Стоматология марказини қуриш, шу билан бирга Халқаро периатрия тиббиёт марказини бунёд этиш мақсадга мувофиқлигини қайд этди.

Туркманистон пойтахтининг жанубий қисмида Стоматология маркази бор ва у 2013 йилда очилган. 2017 йилда Ашхободда тиббиёт университети қошида даволаш хоналарига эга стоматология маркази очилган ва у ҳам беморларни қабул қилади.

Стоматология мараказининг рўпарасида Гурбансултон-Эже номидаги она ва бола саломатлигини ҳимоялаш илмий-клиник маркази жойлашган ва у ерда перинотология, педиатрия ва болалар жарроҳлиги бўлимлари мавжуд.

Аввал Гурбангули Бердимуҳамедов Хитой матбуотига берган интервьюсида «ягона Хитой» сиёсатини қўллаб-қувватлашини билдиргани, ундан олдин эса бобоси номидаги ҳарбий мактаб қуриладиган жойга капсула қўйгани ҳақида хабар қилинган.