Франция, Германия ва Польша — Веймар учбурчаги давлатлари Россияни Европа қитъасидаги хавфсизлик масалалари бўйича мулоқотни бошлашга чақирувчи баёнот билан чиқди. Бу ҳақда «Интерфакс» хабар берди.
Франция президенти Эммануэль Макрон, Германия канцлери Олаф Шольц ва Польша президенти Анжей Дуда Берлиндаги музокаралар якунлари бўйича қўшма ҳужжатда Россияни Украина чегарасидаги вазиятни юмшатишга ҳисса қўшишга ва Европа қитъасидаги хавфсизлик бўйича мазмунли мулоқотни бошлашга чақирган.
Улар «ўзаро манфаатли ва натижага йўналтирилган хавфсизлик масалалари бўйича музокараларда конструктив иштирок этишга» тайёрлигини таъкидлаган.
Ҳужжатда шундай дейилади: «Веймар учбурчаги давлат ва ҳукумат раҳбарлари Европа ва трансатлантик хавфсизлик архитектурасини мустаҳкамлаш бўйича биргаликдаги саъй-ҳаракатларга содиқлигини алоҳида билдирди».
Томонлар Украина суверенитети ва ҳудудий яхлитлигини қўллаб-қувватлашини ҳамда вазият кескинлашган тақдирда Россия учун бунинг «оқибатлари»ни яна бир бор эслатди, шунингдек, Минск келишувларини амалга оширишда Норманд форматининг ролини қайта эътироф этди. Учала етакчи ҳам НАТО воқеаларнинг ўзгарувчанлигини ҳисобга олган ҳолда ҳамда блокни «олд қанотда кенгайтириш» дастури доирасида «мудофаа ва олдини олиш стратегиясини доимий равишда кўриб чиқиши» зарурлигини таъкидлади.
АҚШ президенти Жо Байден ва Германия канцлери Олаф Шольц 7 январь куни Вашингтонда Украина атрофидаги вазият, Россияни жиловлаш ва энергетика билан боғлиқ масалаларни муҳокама қилганди. Ўша куни Кремлда Россия ва Франция президентлари Владимир Путин ҳамда Эммануэль Макрон ўртасида беш соатлик музокаралар бўлиб ўтган. Музокаралардан кейинги баёнотида Макрон «ҳозирча келишиб олдик, деб бўлмайди, лекин жараён бошланди», дея таъкидлаган.
Изоҳ (0)