Германия ташқи ишлар вазири Анналена Бербок ва Украина президенти Владимир Зеленскийнинг учрашуви немис томонининг Киевга ҳарбий ёрдам кўрсатишни истамаётгани туфайли бекор қилинди. Бу ҳақда ўз манбаларига таяниб, CNN телеканали хабар берди.
Украина ҳукуматига яқин бўлган манбанинг сўзларига кўра, Германия ташқи ишлар вазири Россия Украинага «бостириб кирса», Германия «Шимолий оқим-2» газ қувуридан воз кечадими деган саволга жавоб бермаган.
Бундан ташқари, унинг қўшимча қилишича, учрашув «Германия Киевга бевосита ёки билвосита бирор-бир ҳарбий ёрдам кўрсатишни рад этгани» сабаб бекор қилинган.
«Шарқий Европа ва Киевда кўпчилик Германияни Ғарбнинг эмас, балки Россиянинг иттифоқчиси сифатида кўришни бошлаган. Улар ҳам ўзини шундай тутмоқда — собиқ канцлер Шредерга қаранг», — дейди телеканал суҳбатдоши.
Шу билан бирга, Германия канцлери Олаф Шольц Зеленскийнинг Бербок билан учрашишни истамагани тўғрисида ҳеч нарса билмаслигини маълум қилган. «У Киевда. Мен уни юбордим. У фронт чизиғига бориб, вазиятни баҳолайди», — дея қўшимча қилади у.
Шолс, шунингдек, Германия иттифоқчилари АҚШ, НАТО ва ЕИ билан «Россиянинг босқини» амалга ошса, кўриладиган чоралар бўйича аниқ вазифаларни мустаҳкамлаш устида иш олиб бораётганини айтган.
Айни вақтда Шолс Вашингтонда бўлиб турибди. Бу унинг Германия канцлери сифатида Вашингтонга биринчи ташрифи ҳисобланади.
Аввалроқ Канцлер Олаф Шольц Германия Украинага ҳалокатли қуролларни етказиб бериш ниятида эмаслигини айтганди. Шунингдек, The New York Times манбаларига таяниб, Россия Украина ҳудудига бостириб киришга ҳали тайёр эмаслиги, аммо ҳарбий операцияга тайёргарликнинг якуний босқичида экани ҳақида хабар берганди.
Бир неча ойдан буён Ғарб сиёсатчилари ва оммавий ахборот воситалари Россия Украина билан чегараси яқинида ҳарбий кучлар тўплаётгани ҳақида хабар бермоқда, уларнинг фикрича, бу босқинга тайёргарлик бўлиши мумкин. Агар Украинага ҳужум бўлса, Ғарб давлатлари Россияга қарши санкциялар қўлламоқчи.
Изоҳ (0)