Канада пойтахти Оттавада юк машина ҳайдовчиларининг коронавирус чекловларига қарши норозиликлари туфайли фавқулодда ҳолат эълон қилинди, деб хабар беради CBC.
«Фавқулодда ҳолат режимининг эълон қилиниши давом этаётган намойишлар шаҳар аҳолисига жиддий хавф ва таҳдид туғдиришини англатади ҳамда бошқа юрисдикциялар ва ҳукумат даражалари томонидан қўллаб-қувватлов зарурлигини билдиради», — дейди шаҳар мери Жим Уоцон.
Шаҳар расмийларининг таъкидлашича, маҳаллий фавқулодда ҳолат Оттавага муҳим хизматларни бошқариш ва харидларни янада мослашувчан қилиш учун самаралироқ ишлаш имконини беради.
Бунга қадар Уотсон Оттава ҳукумати ва полицияси норозилик намойишларига боғлиқ вазиятни эндиликда назорат қилмаётганини маълум қилган эди. Полиция раҳбари Питер Слоли намойишларни тўхтатиш учун ходимлари етмаслигини тан олган.
5 февраль куни Канада пойтахтидаги норозилик намойиши иштирокчилари сони 5 минг кишига етган. Акцияга маҳаллий аҳоли ва бошқа шаҳарлардан келган канадаликлар келиб қўшилган.
Намойишчилар пандемия билан боғлиқ барча чекловларни бекор қилинишини талаб қиляпти. Маҳаллий, вилоят ва федерал сиёсатчилар намойишчиларнинг ҳаракатларини қоралаган.
Эслатиб ўтамиз, январь ўрталарида Германияда коронавирус чекловларига қарши яна бир норозилик намойишлари бўлиб ўтганди. Шунингдек, Бельгия ва Чехияда коронавирус чекловларига қарши норозилик акцияси бўлиб ўтгани тўғрисида хабар берилганди. Хусусан, Брюсселда бир неча минг киши қўлларига мажбурий вакцинацияга қарши плакатларни кўтариб олган ҳолда Европа даҳасига қадар марш юрган.
Изоҳ (0)