Samarqand viloyatining Urgut tumanidan o‘tgan M-39 avtomobil yo‘lining Taxtaqoracha dovoni 6-fevral kuni soat 17:30 dan avtomobillar harakati uchun vaqtincha yopilgandi. Samarqand viloyati IIBning ma’lum qilishicha, ayni vaqtda dovon yo‘li avtomobillar harakati uchun ochilgan.
“Taxtaqoracha dovonida avtomobil yo‘lini qordan tozalash ishlari olib borilib, ayni vaqtlarda dovon yo‘lida transport vositalarining harakatlanishi uchun ruxsat berildi. Barcha haydovchilardan tezlik me’yorini oshirmasdan, oraliq masofani saqlab harakatlanishlarini so‘raymiz”, — deyiladi xabarda.
FVV ma’lumotlariga ko‘ra, vazirlik tegishli xizmatlar bilan yo‘lga qum-tuz aralashmasini sepish va qordan tozalash ishlarini olib borgan va 7-fevral kuni soat 08:30 da Taxtaqoracha dovoni avtomobillar harakati uchun qayta ochilgan.
Eslatib o‘tamiz, “O‘zgidromet” 6-fevral, yakshanba kuni tog‘oldi va tog‘li hududlarda ba’zi joylarda yog‘ingarchilik kuchli bo‘lishi mumkinligini, tog‘li avtomobil yo‘llarda qor uyumlari va ko‘rinish yomonlashishi kutilayotganini ma’lum qilgandi. Shu kuni Samarqand va Qashqadaryo viloyatlarini bog‘lovchi Taxtaqoracha dovonida kuchli qor yog‘di. Qalin qor tufayli soat 11:00 dan Qashqadaryo viloyatining Kitob tumanidan o‘tgan M-39 avtomobil yo‘lining Taxtaqoracha dovoni avtomobillar harakati uchun vaqtincha yopildi. Qisqa muddatga yopilgan yo‘l 6-fevral kuni soat 11:53 da qayta ochildi.
Izoh (0)