Бухорода қўйхонага айлангани рад этилган «Чор минор» мадрасаси чорбоғида тандирдан ҳам фойдаланиб келингани маълум бўлган эди. Бухоро вилояти Маданий мерос бошқармаси ҳолат юзасидан «Дарё»га маълумот берди.
Қайд этилишича, вилоят Маданий мерос бошқармасига бириктирилган ҳудудларда йўлларни асфальтлаштириш сингари ечимини кутаётган муаммолар рўйхатга олиниб, мавжуд ҳолатни яхшилаш учун вилоят ҳокимлигига тегишли хат билан мурожаат қилинган. Айни пайтда бу борада қилиниши лозим бўлган ишлар режалаштирилмоқда. Қолаверса, юқорида келтирилган мақолада яқинда ижтимоий тармоқ орқали «Чор минор» мадрасаси атрофида қўй боқилгани борасида тарқатилган маълумот атрофлича ўрганилган. Натижада, журналист маҳалла раисининг ушбу мавзуга оид фикрларини келтирган:
«Икки ярим йилдан бери шу маҳаллага раислик қилиб келяпман. Бизнинг ҳудудда 16 та кўча мавжуд бўлиб, Чор минор асосий кўчаларимиздан бири ҳисобланади. «Чор минор» мадрасаси шу кўчада жойлашган бўлиб, унинг ҳудудида сайёҳлар учун қулай шароит яратиб қўйганмиз. Бу ҳудудни фуқаро Мансур Сафаровга топширганмиз. У бу ерда қоровуллик қилади. Ободонлаштириш ишларига ҳам қарашади. Аммо мен раҳбарлик қилган давримда бу ерда қўй ҳам боқилмаган, қўйхона ҳам қилинмаган. Балки уч йил олдинги тасвир бўлиши мумкин,» — деди.
Мазкур масала бўйича бошқарманинг тегишли мутахассислари, жамоатчилик ва шу ҳудудда яшовчи аҳоли вакиллари билан бирга ўрганишлар олиб борилди.
Мақолада «Чор Минор» мадрасаси яқинида тандир ўрнатилгани ва гувоҳларга кўра, ундан хорижий сайёҳларни жалб қилиш учун фойдаланилиши айтиб ўтилганди.
«Бошқарма мутасаддилари ҳолат юзасидан зудлик билан тарихий обидалар жойлашган яқин ҳудудда тандир ёки бошқа қўлбола қурилмалар қуриш тақиқлангани борасидаги тушунтириш ишларини олиб боришди. Натижада, мазкур тандир бузилиб, унинг ўрни тоза, озода ҳолатга келтирилди», — дейилади хабарда.
Изоҳ (0)