Фарзандларининг моддий таъминотидан бўйин товлаган фуқароларга нисбатан маъмурий қамоқ қўлланилгандан сўнг 2 ой давомида алимент тўланмаса, жиноят иши қўзғатилишига асос бўлади. МИБ Наманган вилоят бошқармаси томонидан бу борада тегишли чоралар олиб борилмоқда, дея хабар беради «Дарё» мухбири Азизбек Абдувалиев.
Шокир Аҳмедовдан (исм-шариф шартли) фуқаролик ишлари бўйича Чуст туманлараро суди буйруғига асосан икки нафар фарзанди учун алимент ундирилиши белгиланган. Мазкур ижро ҳужжати МИБ Поп туман бўлими иш юритувига олинган ва қарздор отага нисбатан ижро иши қўзғатилган.
Давлат ижрочиси томонидан Аҳмедовга алиментни ўз вақтида тўлаш зарурлиги тушунтирилган. Бироқ у 96 ой, яъни 8 йил давомида сурункасига алимент тўлашдан қасдан бўйин товлаб келади. Қарздорлик эса 64 миллион сўмдан ошиб кетган.
Бу бўйича тўпланган ҳужжатлар судга юборилиб, Шокир Аҳмедов 2020 йилнинг 4 март куни маъмурий жавобгарликка тортилади ва 15 сутка маъмурий қамоқ белгиланади.
Аммо қарздор ота маъмурий қамоқдан кейин ҳам алиментдан қарздорликни тўламай келади. Шундан сўнг унга нисбатан Жиноят кодексининг 122-моддаси 1-қисми билан жиноят иши қўзғатилди ва суд ҳукми билан 6 ойга озодликдан маҳрум қилинди.
«МИБ вилоят бошқармаси маъмурий амалиёт ва суриштирув шўъбаси томонидан 2021 йилнинг ўзида 21 та ҳолатда алимент тўламаган фуқароларга нисбатан жиноят иши қўзғатилди. Улар 6 ойдан 1 йилгача бўлган муддатга озодликдан маҳрум этилган», —дейди бошқарма катта инспектори Содиқжон Муҳиддинов.
Изоҳ (0)