Buxoroda qo‘yxonaga aylangani rad etilgan “Chor minor” madrasasi chorbog‘ida tandirdan ham foydalanib kelingani ma’lum bo‘lgan edi. Buxoro viloyati Madaniy meros boshqarmasi holat yuzasidan “Daryo”ga ma’lumot berdi.
Qayd etilishicha, viloyat Madaniy meros boshqarmasiga biriktirilgan hududlarda yo‘llarni asfaltlashtirish singari yechimini kutayotgan muammolar ro‘yxatga olinib, mavjud holatni yaxshilash uchun viloyat hokimligiga tegishli xat bilan murojaat qilingan. Ayni paytda bu borada qilinishi lozim bo‘lgan ishlar rejalashtirilmoqda. Qolaversa, yuqorida keltirilgan maqolada yaqinda ijtimoiy tarmoq orqali “Chor minor” madrasasi atrofida qo‘y boqilgani borasida tarqatilgan ma’lumot atroflicha o‘rganilgan. Natijada, jurnalist mahalla raisining ushbu mavzuga oid fikrlarini keltirgan:
“Ikki yarim yildan beri shu mahallaga raislik qilib kelyapman. Bizning hududda 16 ta ko‘cha mavjud bo‘lib, Chor minor asosiy ko‘chalarimizdan biri hisoblanadi. “Chor minor” madrasasi shu ko‘chada joylashgan bo‘lib, uning hududida sayyohlar uchun qulay sharoit yaratib qo‘yganmiz. Bu hududni fuqaro Mansur Safarovga topshirganmiz. U bu yerda qorovullik qiladi. Obodonlashtirish ishlariga ham qarashadi. Ammo men rahbarlik qilgan davrimda bu yerda qo‘y ham boqilmagan, qo‘yxona ham qilinmagan. Balki uch yil oldingi tasvir bo‘lishi mumkin,” — dedi.
Mazkur masala bo‘yicha boshqarmaning tegishli mutaxassislari, jamoatchilik va shu hududda yashovchi aholi vakillari bilan birga o‘rganishlar olib borildi.
Maqolada “Chor Minor” madrasasi yaqinida tandir o‘rnatilgani va guvohlarga ko‘ra, undan xorijiy sayyohlarni jalb qilish uchun foydalanilishi aytib o‘tilgandi.
“Boshqarma mutasaddilari holat yuzasidan zudlik bilan tarixiy obidalar joylashgan yaqin hududda tandir yoki boshqa qo‘lbola qurilmalar qurish taqiqlangani borasidagi tushuntirish ishlarini olib borishdi. Natijada, mazkur tandir buzilib, uning o‘rni toza, ozoda holatga keltirildi”, — deyiladi xabarda.
Izoh (0)