АҚШнинг Шимолий Корея бўйича махсус вакили Сон Ким яқин кунларда жанубий кореялик ва япониялик ҳамкасблари билан янги алоқалар ўрнатади. Бу ҳақда АҚШ давлат котибининг Шарқий Осиё ва Тинч океани масалалари бўйича ёрдамчиси Даниэль Критенбринк журналистларга маълум қилди, деб ёзади «ТАСС».
Унинг сўзларига кўра, Шимолий Корея муаммоси, КХДРнинг ядровий ва ракета дастурлари таҳдидига қарши курашиш АҚШ, шунингдек, Жанубий Корея ва Япония учун устувор вазифа ҳисобланади.
«Ўйлайманки, уч томонлама асосда давом этаётган ҳамкорлигимиз элчи Сон Ким ва унинг япониялик ҳамда жанубий кореялик ҳамкасблари ўртасидаги ўзаро ҳамкорлик орқали яқин кунларда янада ўсишини кўрасиз», — деди АҚШ давлат котиби ёрдамчиси.
Ўз навбатида, АҚШнинг БМТдаги доимий вакили Линда Томас-Гринфилд БМТ Хавфсизлик кенгашининг КХДР бўйича ёпиқ йиғилиши якунида, Қўшма Штатлар КХДРнинг ҳеч қандай олд шартларсиз музокара ўтказиш таклифини қабул қилишини кутаётганини айтди.
«Биз КХДРни АҚШ ва бошқа мамлакатларнинг ҳеч қандай олд шартларсиз учрашиш таклифларига ижобий жавоб беришга чақиришда давом этамиз. Биз мулоқотга тайёрмиз», — деди Томас-Гринфилд.
АҚШ тегишли шартлар остида КХДР билан юқори даражадаги алоқалар имкониятини истисно этмаяпти, бироқ ҳозирча Пхеньян бирорта музокарага қўшилгани йўқ, таъкидлади Линда Томас-Гринфилд.
Линда Томас-Гринфилднинг қайд этишича, ракета синовларини давом эттираётган КХДРнинг ҳаракатларига энг яхши жавоб сифатида АҚШ ҳозирча фақат босимни ошириш йўлини кўрмоқда.
Эслатиб ўтамиз, Шимолий Корея йил бошидан буён баллистик ракеталарни фаол синовдан ўтказмоқда. Хусусан, 30 январь куни мамлакат тезлиги товуш тезлигидан 16 марта юқори бўлган ўрта масофага мўлжалланган баллистик ракетани учирди.
Изоҳ (0)