АҚШ Давлат департаменти Россия Украинага бостириб киришга баҳона сифатида фойдаланиш учун сохта видеотасвирлар тайёрлаганини айтди. Бу ҳақда департамент матбуот хизматининг раҳбари Нед Прайсга таяниб, Reuters хабар берди.
Разведка маълумотларига кўра, Россия Украина ҳарбийларининг гўёки Россия ҳудудига ёки Украина шарқидаги русийзабон аҳолига қандай ҳужум қилаётганини саҳналаштириб, тасвирга олмоқчи. Улар видеода ўликлар ролини ижро этувчи актёрларни, шунингдек, Украинанинг сохта ҳарбий техникаси ва турк дронлари билан уюштирилган портлашлар оқибатларини кўрсатмоқчи, деб ёзган The New York Times газетаси. Видеони яратиш ортида айнан ким тургани номаълум, бироқ NYT манбаларининг айтишича, Россия разведкаси унга «яқиндан аралашган».
NYT манбаларига кўра, Россия ушбу видеодан Украинани русийзабон аҳолини геноцид қилишда айблаш, шунингдек, мазкур мамлакатга босқинни оқлаш учун ишлатишни режа қилган. «Ушбу видео, агар эълон қилинса, Россия президенти Владимир Путинга Украинага қарши ҳарбий ҳаракатлар бошлаш ва бу ҳаракатларни оқлашга баҳона бўлиши мумкин», — деди исмини ошкор этмаган Оқ уй расмийси Reuters агентлигига.
Россия президентининг матбуот котиби Дмитрий Песков Америка расмийларининг баёнотини изоҳлар экан, АҚШ Россиянинг Украинага бостириб кириш режалари ҳақида биринчи марта гапирмаётгани, аммо шу пайтгача ҳеч нарса бўлмаганини айтди. «Бу биринчи даъво эмас. Илгари ҳам шунга ўхшаш гаплар айтилганди. Лекин бундан ҳеч нарса чиқмаган», — деди Кремль вакили.
Россия бир неча ойдан бери Украина чегараларига қўшин тўпламоқда, бу эса Ғарб давлатларининг Россия Украинага бостириб киришга тайёрланаётгани ҳақидаги тахминларига сабаб бўлмоқда. Москва буни қатъиян рад этиб, қўшинларнинг ўтказилишини машқлар билан изоҳлайди. Ғарб давлатлари Россия Украинага бостириб кирса, унга қарши санкциялар қўллашга ваъда бермоқда.
Изоҳ (0)