Покистон жануби-ғарбидаги Балужистон вилоятида мамлакат чегара корпусининг ҳарбийлаштирилган тузилмасига қарашли иккита лагерига қилинган ҳужумлар оқибатида 13 нафар террорчи йўқ қилинди ва етти нафар ҳарбий хизматчи ҳалок бўлди. Бу ҳақда мамлакат Мудофаа вазирлигига таяниб, Sinxua агентлиги хабар берди.
Маълум қилинишича, хавфсизлик кучлари Балужистон вилоятининг Панжгур ва Нушки округларига уюштирилган ҳужумларнинг иккисини ҳам қайтарган. Ҳужум оқибатида тўрт нафар террорчи йўқ қилинган ва бир нафар ҳарбий хизматчи ҳалок бўлган.
Ҳужум қайтарилгач, хавфсизлик кучлари тозалаш ва ҳудудда яширинган террорчиларни қўлга олиш бўйича операция ўтказган.
«Хавфсизлик кучлари Нушки округида яна беш нафар террорчига дуч келди ва уларни йўқ қилди», — дейилади хабарда. Маълумотларга кўра, тўрт нафар ҳарбий хизматчи, жумладан, бир нафар офицер ҳам ҳалок бўлган.
Бундан ташқари, Панжгур округида тўрт нафар террорчи ўлдирилган ва яна камида беш нафари қуршаб олинган. Хавфсизлик кучларининг мазкур округдаги операцияси айни вақтда давом этмоқда.
«Балужистонни озод этиш фронти» номли тақиқланган ташкилот ҳужум учун масъулиятни ўз зиммасига олган.
Эслатиб ўтамиз, январь охирларида Покистон жануби-ғарбидаги Балужистон провинциясида содир этилган терактда 10 нафар ҳарбий ҳалок бўлганди.
Изоҳ (0)