АҚШ собиқ президенти Дональд Трамп 2024 йилда яна мамлакат президенти этиб сайланса, Капитолийга бостириб киришда айбланганлар ва тартибсизлик иштирокчиларини афв этишини айтди.
«Агар сайловда қатнашсам ва ғалаба қозонсам, биз бу одамларга адолатли муносабатда бўламиз. Афв қилишга тўғри келса, уларни кечирамиз, чунки (ҳозир) уларга нисбатан адолатсиз муносабатда бўлишмоқда», — деди Трамп Техасдаги тарафдорлари билан учрашувда.
2021 йил 6 январь куни АҚШ Конгресси аъзолари Дональд Трампнинг президентлик сайловларида мағлуб бўлганини тасдиқлаш учун йиғилган вақтда Трампнинг тарафдорлари Конгрессга бостириб кирганди. Тартибсизликлар оқибатида Капитолийнинг хавфсизлик ходими билан биргаликда, беш киши ҳалок бўлган.
Байден ушбу тартибсизликларни давлат тўнтаришига уриниш деб билишини айтганди. Унинг сўзларига кўра, ўшанда «гуруҳни тартибсизликларга ундашга, эркин ва адолатли сайловларни рад этишга ҳамда Америка тарихида биринчи марта ҳокимиятнинг тинч йўл билан ўтишига тўсқинлик қилишга» уринилган.
Ҳужум бўйича олиб борилган кенг кўламли тергов давомида 700 дан ортиқ одам ҳибсга олинган ва уларга турли даражада айбловлар қўйилган.
Трамп, шунингдек, 2022 йилда Пекинда бўлиб ўтадиган қишки Олимпия ўйинларидан кейин Хитой ва Тайван ўртасида маълум ўзгаришлар бўлишидан огоҳлантирди. У президент Жо Байден маъмуриятини Хитой билан муносабат ўрнатишда қобилятсизликда айблади.«Келинг, Олимпия ўйинларидан кейин нима бўлишини кўрамиз, мен яхши башоратчиман, ўйинлардан кейин Тайван ва Хитой билан нималар юз беришини кўрайликчи?», — деди Трамп.
Шунингдек, Трамп Конгресс республикачилар назоратига қайтган заҳоти АҚШ президенти Жо Байден устидан коррупцияга қарши тергов бошлаш билан таҳдид қилди.
«Ишончингиз комил бўлсин, республикачилар Конгрессда ғалаба қозонса, Байденнинг коррупцияси Конгресс томонидан текширилади ва фош қилинади. Байденларнинг Хитойдан олган миллионлаб долларлари, шунингдек, Жо нега (Хитой) Коммунистик партиясини бизда ва бутун дунёда тарқалган вирус учун жавобгарликка тортишдан бош тортганини тушунтириб беради», — деди собиқ президент.
Бундан ташқари Трампнинг айтишича, АҚШнинг ҳозирги маъмурияти ўз чегараларини ҳимоя қилиш ўрнига Украинани ҳимоя қилишга ҳаддан ташқари кўп эътибор қаратмоқда.«Вашингтонда ҳамма Украина чегарасини қандай ҳимоялаш ҳақида ўйлаяпти, аммо биз учун дунёдаги энг муҳим чегара — бу Украина чегараси эмас, Америка чегараси. Бу борада эса ҳеч нарса қилмаяпмиз, кимлиги ҳақида маълумотимиз бўлмаган одамларга мамлакатимизга кириш учун рухсат беряпмиз», — деди собиқ президент.
Трамп, 2021 йил январидаги воқеаларга қарамай, Республикачилар партиясида жуда машҳурлигича қолмоқда. Кузатувчилар у 2024 йилда яна АҚШ президенти бўлишга уриниб кўриши мумкинлигини истисно қилмаяпти. Ўз навбатида, Байден ҳам соғлиғида жиддий муаммолар бўлмаса, 2024 йилда қайта сайланишга ҳаракат қилишини айтган.
Мавзуга доир: Трамп президентлик даври ҳақида китоб чоп этмоқчи
Изоҳ (0)