Италия президенти, 80 ёшли Сержо Маттарелла иккинчи муддатга қайта сайланди. У мамлакат парламенти аъзоларининг қўшма мажлисида зарур 505 та овоз чегарасидан ўтишга муваффақ бўлди.
Маттарелла 3 февраль куни ўз лавозимини тарк этиши керак эди, бироқ мамлакатда сиёсий барқарорликка олиб келиши мумкин бўлган омиллар туфайли фикрини ўзгартирди. Коалициядаги партиялар ундан президентликни тарк этиш ҳақидаги қарорини қайта кўриб чиқишни сўрагач, Маттарелла иккинчи муддатга сайланишга рози бўлди.
Италия конституциясининг 83-моддасига кўра, президент парламент томонидан аъзоларнинг қўшма йиғилишида сайланади, парламент таркибига мамлакатнинг 20 та ҳудудидан ҳам делегатлар киради. Сайланиш учун дастлабки уч турда овозларнинг учдан икки қисмини олиш керак, тўртинчи турдан бошлаб мутлақ кўпчиликнинг (50 фоиздан ортиқ) овози кифоя.
Сержо Маттарелла — Палермода туғилган, у 1980 йилларда Христиан-Демократик партияси сафида сиёсий фаолиятини бошлаган. Сицилия губернатори бўлган акаси Персанти Маттарелла 1980 йилда мафия буйруғи билан ўлдирилганидан кейин ҳуқуқ факультети битирувчиси Сержо сиёсатга юзланган.
1983 йилда Сержо Маттарелла биринчи марта парламентга сайланди, 1989 йилда эса таълим вазири лавозимини эгаллаб, ҳукумат таркибига кирди. Маттарелла «маттареллум» номини олган сайлов қонунчилигининг асосий муаллифларидан бири ҳисобланади.
Сержо Маттарелло фаолияти давомида яна бир қатор лавозимларда ишлади. 2011 йилда Конституциявий суднинг судьяси этиб сайланди. 2015 йилда эса у Италиянинг 12-президенти бўлди.
Изоҳ (0)