29 январь куни Мексика ғарбидаги Халиско штатида 20 дан ортиқ йўловчини олиб кетаётган микроавтобус ағдарилиб кетди. Ҳодиса оқибатида 13 киши ҳалок бўлди, яна 10 киши жароҳат олди. Бу ҳақда ҳудудий фавқулодда вазиятлар бошқармаси Twitter’да маълум қилди.
«Автоҳалокатдан кейинги қутқарув операцияси якунига етди. Саккиз эркак ва тўрт аёл, жумладан, икки нафар вояга етмаганлар воқеа жойида вафот этди, яна бир киши касалхонада жон берди, 10 нафар йўловчи жароҳат олди», — дейилади хабарда.
Қайд этилишича, беш нафар жабрланувчининг аҳволи оғир деб баҳоланмоқда. Фожианинг эҳтимолий сабаблари ҳақида маълумот берилмаган.
Шу билан бир вақтда Боливиянинг Кочабамба департаментида йўловчи автобуси тоғ йўлидан қулаб тушган. Correo del Sur хабарига кўра, ЙТҲ оқибатида ўн бир киши ҳалок бўлган, етти киши жароҳат олган.
Индонезияда 21 январь куни юк машинаси иштирокида йирик авария содир бўлганди. Светофорнинг қизил чироғида тормози ишламай қолган юк машинаси ўнлаб автомобиль ва мотоциклларга бориб урилган. Ҳодиса оқибатида 19 киши ҳалок бўлган.
Аввал Танзанияда микроавтобус иштирокидаги ЙТҲда 14 нафар, Мисрда автобус иштирокидаги ЙТҲда 16 нафар одам ҳалок бўлгани ҳақида хабар берилганди.
Изоҳ (0)