Франция ҳукумати аввал ваъда қилганидек, Пекинда ўтказиладиган қишки Олимпиада ўйинларига дипломатик бойкот эълон қилган бир қатор Ғарб давлатларига қўшилмади. Бу ҳақда Франциянинг Европа ишлари бўйича давлат котиби Клемент Бонга таяниб, «Интерфакс» хабар берди.
«Ўйинларда спорт вазир-делегати Роксана Марасиняну иштирок этади. У очилиш маросимига қатнаша олмаслиги мумкин, лекин Олимпиада ўйинлари пайтида спортчиларимизни қўллаб-қувватлаш учун боради», — деди Бон РТЛ радиостанцияси эфирида.
Аввалроқ Франция президенти Эммануэль Макрон Пекинда 4 февралда бошланадиган Олимпиада ўйинларини дипломатик бойкот қилиш ғоясини мантиқсиз деб ҳисоблашини айтганди. Макроннинг фикрича, ё Олимпиадани «бутунлай бойкот қилиш» ва унга спортчиларни юбормаслик керак, ёки «фойдали ҳаракатлар билан вазиятни ўзгартиришга уриниш» керак.
Бунга қадар АҚШ Хитойни инсон ҳуқуқларини бузишда айблаб, қишки Олимпиада ўйинларини сиёсий бойкот қилганди. Австралия, Буюк Британия ва Канада унга қўшилган.
Маълумот учун, дипломатик бойкот расмий делегацияларнинг Олимпиадага боришдан бош тортишини англатади. Ушбу чекловлар спортчиларга таъсир қилмайди.
XXIV қишки Олимпиада ўйинлари Пекинда 2022 йилнинг 4—20 февраль кунлари бўлиб ўтади. 4—13 март кунлари Хитой пойтахти Паралимпия ўйинларига мезбонлик қилади.
Изоҳ (0)