ОАВ: Буюк Британия бош вазири Украина атрофидаги вазият сабаб Японияга ташрифини бекор қилди

Буюк Британия бош вазири Борис Жонсон Японияга режалаштирилган ташрифини бекор қилди, деб хабар беради Kyodo агентлиги.

Япония агентлигининг ҳукуматдаги манбаларига таяниб маълум қилишича, Жонсоннинг мамлакатга ташрифи февраль ўрталарига режалаштирилган бўлган, бироқ Британия томони Токиога мазкур ташриф бекор қилингани тўғрисида хабар берган. Бунга «Украина атрофидаги вазиятнинг кескинлашуви» сабаб қилиб кўрсатилган.

Ташрифга тайёргарлик кўрилаётгани тўғрисида расман хабар берилмаган, аммо NHK телеканали 29 январь куни Жонсон февраль ўрталарида Японияга келиши ва бош вазир Фумидо Кисида билан бирга музокаралар ўтказишини маълум қилганди. Тахминларга кўра, томонлар Хитой, Украина, янги коронавирусга қарши кураш, шунингдек, декарбонизация (углероддан фойдаланишни камайтириш) масалаларини муҳокама қилиши керак бўлган.

Япония Вазирлар Маҳкамасининг бош котиби Хирокадзу Мацуно 31 январь куни ўтказилган матбуот анжуманида «Буюк Британия бош вазирининг Японияга ташрифи ҳозирда мувофиқлаштирилаётгани ҳақидаги маълумотлар ҳақиқатга тўғри келмаслигини» маълум қилган.

Россия бир неча ойдан бери Украина чегараларига қўшин тўпламоқда, бу эса Ғарб давлатларининг Россия Украинага бостириб киришга тайёрланаётгани ҳақидаги тахминларига сабаб бўлмоқда. Москва буни қатъиян рад этиб, қўшинларнинг ўтказилишини машқлар билан изоҳлайди. Ғарб давлатлари Россия Украинага бостириб кирса, унга қарши санкциялар қўллашга ваъда бермоқда.