АҚШ президенти Жо Байден «Толибон» ҳукуматининг қонунийлиги масаласини кўриб чиқиш учун зарур бўлган дастлабки шартни айтди. Бу ҳақда Оқ уй сайтидаги баёнотда маълум қилинган.
Байден «Толибон»дан 2020 йилда Афғонистонда қўлга олинган АҚШ ҳарбий денгиз кучлари фахрийси Марк Фрерихсни озод қилишни талаб қилди ва шундан кейингина толиблар ҳукуматини қонунийлаштириш муҳокамаси бошланиши мумкинлигини айтди.
« ‘Толибон’ уларнинг қонунийликка интилишлари борасидаги ҳар қандай масаланинг кўриб чиқилишига умид қилишдан аввал Маркни зудлик билан озод қилиши керак. Бу масалада ҳеч қандай музокарага ўрин йўқ», — деди Байден.
Баёнотга кўра, Фрерихс 2020 йилнинг февраль ойи бошида Кобулда ғойиб бўлган. У Афғонистонда ўн йил қурувчи-муҳандис бўлиб яшаганди.
Байденнинг айтишича, Иллинойс штатида туғилган Фрерихснинг оиласи «уқубатли икки йилни бошидан кечирган, унинг хавфсизлиги учун ибодат қилган, қаердалиги ва аҳволи қандай экани ҳақида ҳар хил гумонда бўлган ва унинг қайтишини тилаган».
Аввалроқ Норвегия пойтахти Ослода Ғарб дипломатлари ва ҳуқуқ фаолларининг «Толибон» вакиллари билан музокаралари бўлиб ўтганди. Учрашувнинг асосий мавзуси афғон халқига гуманитар ёрдам бериш ва мамлакатда инсон ҳуқуқларига риоя қилиш масаласи бўлган. Норвегия Ташқи ишлар вазирлиги бу учрашувлар «Толибон»ни тан олиш эмаслигини таъкидлаган.
Ундан аввал «Толибон» Норвегияда афғон фуқаролик жамиятининг аъзолари билан музокаралар ўтказганди.
Изоҳ (0)