Rossiya G‘arbni obro‘sizlantirish va Ukraina atrofidagi vaziyatni murakkablashtirishga qaratilgan kiberhujumlar o‘tkazishni rejalashtirmoqda. Bu haqda Buyuk Britaniya mudofaa vaziri Ben Uolles ma’lum qildi, deb xabar beradi The Times.

Foto: Getty Images

“Rossiyaning jismoniy bosqini kibermakonda ham amalga oshirilishini kutgan bo‘lardim… Obro‘sizlantirish ham ushbu vositalar to‘plamining bir qismidir”, — deya ta’kidlaydi u.

Mudofaa vazirligidagi yuqori martabali amaldor London Moskva o‘n minglab askar va tanklar Ukrainaga bostirib kirganida “G‘arbni chalg‘itish” uchun “ko‘plab kiberhujumlar”ni o‘tkazadi, deb hisoblayotganini gazetaga tasdiqlagan.

Boshqa g‘arb mamlakatlari, shuningdek, Rossiyaning yolg‘on ma’lumotlar tarqatishiga, ijtimoiy tarmoqlarni feyk xabarlar bilan to‘ldirishi va G‘arbni bo‘lib yuborish maqsadida botlardan foydalanishiga tayyorlanmoqda, deb yozadi Times

18-yanvar kuni Britaniya vaziri Rossiya mudofaa vaziri Sergey Shoyguni Ukrainadagi vaziyatni muhokama qilish uchun Londonga taklif qilgandi. Rossiya vaziri “xavfsizlik bo‘yicha barcha muhim masalalarni muhokama qilishga tayyorligi”ni tasdiqlagan, biroq muzokaralarni Moskvada, Uolles uchun qulay vaqtda o‘tkazish taklifini bergan.

Uolles BBC’ga bergan intervyusida Rossiyaga tashrif buyurishi va Shoygu bilan uchrashishini tasdiqlagan. U diplomatik muvaffaqiyatga umid qilmasligini, lekin Rossiyaning Ukraina hududiga “bosqinini” to‘xtatish imkoniyatiga mavjudligini ta’kidlagan.

Eslatib o‘tamiz, 27-yanvar kuni Rossiya Tashqi ishlar vazirligida Moskva “hatto rus va ukrain xalqi o‘rtasida urush bo‘lishi haqidagi g‘oyani nomaqbul deb hisoblashi” ma’lum qilindi. 28-yanvar kuni Davlat Dumasi spikeri Vyacheslav Volodin “Rossiya Ukraina bilan urushmaydi”, biroq bu “davlatlarimizni bir-biriga qarshi qayrash uchun hamma ishni qilayotgan Vashingtonni qanoatlantirmaydi” dedi.