Исроил президенти Исхак Герцог ва унинг рафиқаси 30 январь куни Бирлашган Араб Амирликларига (БАА) биринчи расмий ташриф билан учиб кетгани тўғрисида хабар берилганди. БАА ҳукумати Герцогнинг мамлакатга ташрифи давомида яманлик исёнчи хусийлар томонидан учирилган баллистик ракетани тутиб қолиб, йўқ қилди, деб хабар бермоқда Associated Press.
БААнинг WAM давлат ахборот агентлиги маълумотларига кўра, «ҳужум бирор-бир йўқотишга олиб келмаган, чунки баллистик ракета қолдиқлари аҳоли пунктларидан ташқарига қулаган».
Амирлик авиация ҳукуматининг маълум қилишича, мазкур ракета ҳужуми БААдаги авиақатновларга таъсир кўрсатмаган.
Ракета орқали уюштирилган ҳужум Форс кўрфазидаги кескинликни янада кучайтиради, аввалроқ амирлик яқинида ҳужумлар серияси содир этилганди. Бу Яманда узоқ йиллардан бери давом этаётган уруш ва Эроннинг дунё етакчилари билан ядро келишувини бузган бир пайтда содир бўлмоқда.
Исроил президентли Исхак Герцог мамлакатда давлат ташрифи билан бўлиб турибди. У 30 январь куни Абу-Даби валиаҳд шаҳзодаси Муҳаммад бин Заид ал-Наҳаён билан учрашган. Герцог Дубайда ўтказилаётган «Экспо-2020» халқаро кўргазмасига ҳам ташриф буюриши режалаштирилган.
Эслатиб ўтамиз, 2021 йилнинг март ойида тарихда биринчи марта БАА элчиси Исроилнинг Тель-Авив шаҳрига ташриф буюрганди. 14 июль куни эса БАА Тель-Авив шаҳрида ўз элчихонасини расман очган. Ўша йилнинг июнь ойи охирида Абу-Дабида Исроил элчихонаси очилган эди.
Изоҳ (0)