Украина разведкаси Киевдаги бош офисидан махфий материаллар ва ускуналарни Украина ғарбидаги хавфсиз жойга олиб кетди. Бу ҳақда The Washington Post нашри манбаларига таяниб, хабар берди.
Нашрнинг қайд этишича, махфий ҳужжатларнинг пойтахтдан олиб чиқилиши, шунингдек, иттифоқчилардан қурол-яроғ етказиб берилиши Украинанинг Россия босқинига йўл бераётгани ва урушга ҳозирлик кўраётганидан далолат беради.
Шу билан бирга, АҚШ ҳукуматидан исмини ошкор этмаган амалдорнинг нашрга айтишича, Украина президенти Владимир Зеленский маъмурияти ва украиналик ҳарбийлар Россия босқинининг эҳтимолини бир-бирдан фарқлича баҳоламоқда. Унинг сўзларига кўра, Зеленскийга маслаҳатчилари айтган гаплар билан ҳарбий ва разведка ходимлари айтган маълумотлар ўртасида тафовут бор.
Россия бир неча ойдан бери Украина чегараларига қўшин тўпламоқда, бу эса Ғарб давлатларининг Россия Украинага бостириб киришга тайёрланаётгани ҳақидаги тахминларига сабаб бўлмоқда. Москва буни қатъиян рад этиб, қўшинларнинг ўтказилишини машқлар билан изоҳлайди. Ғарб давлатлари Россия Украинага бостириб кирса, унга қарши санкциялар қўллашга ваъда бермоқда.
Шу фонда АҚШ, Буюк Британия ва Германия ўз дипломатларининг оила аъзоларини, шунингдек, айрим ходимларини Киевдан эвакуация қилишга қарор қилди. Зеленский Ғарб дипломатларининг Украинадан эвакуация қилинишини хато деб атади. «Улар дипломатия капитанлари. Улар давлатларининг вакиллари ва биламизки, капитанлар кемани энг охирида тарк этади. Биз ‘Титаник’ эмасмиз. Украина олдинга интилмоқда», — дея таъкидлади Зеленский.
Изоҳ (0)