Ukraina razvedkasi Kiyevdagi bosh ofisidan maxfiy materiallar va uskunalarni Ukraina g‘arbidagi xavfsiz joyga olib ketdi. Bu haqda The Washington Post nashri manbalariga tayanib, xabar berdi.
Nashrning qayd etishicha, maxfiy hujjatlarning poytaxtdan olib chiqilishi, shuningdek, ittifoqchilardan qurol-yarog‘ yetkazib berilishi Ukrainaning Rossiya bosqiniga yo‘l berayotgani va urushga hozirlik ko‘rayotganidan dalolat beradi.
Shu bilan birga, AQSh hukumatidan ismini oshkor etmagan amaldorning nashrga aytishicha, Ukraina prezidenti Vladimir Zelenskiy ma’muriyati va ukrainalik harbiylar Rossiya bosqinining ehtimolini bir-birdan farqlicha baholamoqda. Uning so‘zlariga ko‘ra, Zelenskiyga maslahatchilari aytgan gaplar bilan harbiy va razvedka xodimlari aytgan ma’lumotlar o‘rtasida tafovut bor.
Rossiya bir necha oydan beri Ukraina chegaralariga qo‘shin to‘plamoqda, bu esa G‘arb davlatlarining Rossiya Ukrainaga bostirib kirishga tayyorlanayotgani haqidagi taxminlariga sabab bo‘lmoqda. Moskva buni qat’iyan rad etib, qo‘shinlarning o‘tkazilishini mashqlar bilan izohlaydi. G‘arb davlatlari Rossiya Ukrainaga bostirib kirsa, unga qarshi sanksiyalar qo‘llashga va’da bermoqda.
Shu fonda AQSh, Buyuk Britaniya va Germaniya o‘z diplomatlarining oila a’zolarini, shuningdek, ayrim xodimlarini Kiyevdan evakuatsiya qilishga qaror qildi. Zelenskiy G‘arb diplomatlarining Ukrainadan evakuatsiya qilinishini xato deb atadi. “Ular diplomatiya kapitanlari. Ular davlatlarining vakillari va bilamizki, kapitanlar kemani eng oxirida tark etadi. Biz ‘Titanik’ emasmiz. Ukraina oldinga intilmoqda”, — deya ta’kidladi Zelenskiy.
Izoh (0)