АҚШ Тайван ҳукуматини оролнинг мустақиллигини эълон қилишга ундашни давом этса, Хитой ва Қўшма Штатлар ўртасида ҳарбий зиддият келиб чиқиши мумкин. Бу ҳақда Хитойнинг Америкадаги элчиси Син Ган NPR радиосига берган интервьюсида огоҳлантирган.
«Таъкидлашимга рухсат берсангиз: Тайван масаласи — Хитой ва Қўшма Штатлар ўртасидаги энг катта муаммо. Агар Тайван ҳукумати АҚШнинг маъқуллови остида мустақилликни эълон қилиш йўлида давом этса, бу катта эҳтимол билан Хитой ва АҚШ каби иккита йирик давлат ўртасида қуролли зиддиятни юзага келтиради», — дейди элчи.
Пентагон CNN телеканалининг сўровига кўра, хитойлик дипломатнинг баёнотига изоҳ бериб, Қўшма Штатлар аввалгидек «ягона Хитой» сиёсатига содиқлигини, шунингдек, Тайван билан муносабатлари тўғрисидаги Америка қонунида белгиланган мажбуриятларни бажаришини маълум қилган.
Мазкур қонун 1979 йилда АҚШ ва Хитой ўртасида дипломатик муносабатлар ўрнатилганидан кейин қабул қилинган. У Тайван билан тузилган ўзаро мудофаа бўйича Хитой—Америка шартномаси ўрнини эгаллаган. Тайван билан муносабатлар тўғрисидаги қонунда АҚШнинг орол хавфсизлигини таъминлаш масалалари бўйича мажбуриятлари белгиланган.
Аввалроқ Хитой АҚШни Тайван билан расмий алоқаларини зудлик билан тўхтатишга, шунингдек, совуқ уруш менталитетидан воз кечиб, ХХРга хаёлий рақиб сифатида муносабатда бўлишни бас қилишга чақирганди.
Изоҳ (0)