КХДР Япон денгизи томонга яна бир номаълум снарядни учирди

Шимолий Корея 30 январь куни Япон денгизи томонга номаълум снаряд учирди, деб ёзмоқда Yonhap агентлиги Жанубий Корея штаб бошлиқларининг бирлашган қўмитасига таяниб.

Япония мудофаа вазирининг сўзларига кўра, снаряд баллистик ракета бўлиши мумкин, деб хабар беради Kyodo. Кейинчалик Жанубий Корея ҳарбийлари ҳам худди шундай тахминни илгари сурди.

Япония қирғоқ қўриқлаш хизмати снаряд аллақачон қулаганини хабар қилган. Муассаса объект хавфли бўлиши мумкинлигидан огоҳлантирган.

Япония ҳукумати матбуот котиби Хирокадзу Мацунонинг сўзларига кўра, тахмин қилинган баллистик ракета 800 км учган, максимал парвоз баландлиги эса 2 минг км атрофида бўлган. Мацуно снарядни учириш Бирлашган Миллатлар Ташкилотининг Хавфсизлик Кенгаши резолюцияларини бузганини таъкидлади. Мамлакат КХДРга кескин норозилик билдирган.

Япония бош вазири Фумио Кисида ҳукуматга воқеалар тўғрисида жамоатчиликни зудлик билан хабардор қилишни, кемалар ва самолётлар хавфсизлигини таъминлашни топширди. Ҳукуматдаги манбанинг Kyodo агентлигига айтишича, учиришдан кўрилган зарар ҳақида ҳозирча маълумотлар мавжуд эмас.

Жанубий Корея ҳарбийлари номаълум снарядни учириш Чагандо провинцияси ҳудудидан амалга оширилган, деб тахмин қилмоқда.

Бу Шимолий Кореянинг 2022 йил бошидан бери еттинчи марта ракета учириши. Сўнгги марта Жанубий Корея ҳарбийлари 27 январь куни қўшни давлат томонидан снарядлар учирилгани ҳақида хабар берганди. Ўшанда КХДР Япон денгизи томон иккита қисқа масофали баллистик ракета учиргани тахмин қилинган.

Ундан аввал Шимолий Корея 25 январь куни ракета учирган эди. Мамлакат жорий йилдаги биринчи ракетасини 5 январь куни, иккинчисини — 11 январда, учинчисини — 14 январда учирган. Шунингдек, 17 январь куни ҳам Япон денгизи томон яна бир снаряд учирилган. Kyodo агентлиги маълумотларига кўра, гап баллистик ракеталар ҳақида кетмоқда.

Ракеталарнинг учирилиши фонида АҚШ 13 январь куни КХДРга нисбатан БМТ тармоқлари бўйича янги санкцияларни жорий этиш таклифини билдирди. Мамлакатнинг БМТдаги доимий вакили Линда Томас-Гринфилднинг сўзларига кўра, Вашингтон ҳар бир ракета учирилиши БМТ Хавфсизлик Кенгаши резолюциясини бузмоқда деб ҳисоблайди.

Шундан сўнг, Шимолий Корея АҚШ Пхеньянга нисбатан янги санкцияларни жорий этгач, «янада кучли ва аниқ жавоб» қайтаришга мажбур бўлиши ҳақида огоҳлантирди.