Канада бош вазири Жастин Трюдо ва унинг оиласи хавфсизлик нуқтаи назаридан пойтахт Оттавадаги қароргоҳини тарк этди. Бу ҳақда CBC телеканали хабар берди.
Бош вазирнинг айнан қаерга кетгани ошкор этилмаган. Трюдонинг қароргоҳи Ридо-холлда, шаҳар марказидан унчалик узоқ бўлмаган Канада генерал-губернатори резиденциясининг ёнида жойлашган. Ҳозирча ҳудудда қонунбузарлик ҳолатлари қайд этилмаган.
Оттавада 23 январь куни «Озодлик устуни» шиори остида юк ташувчиларнинг ҳукуматга қарши митинги бошланди. Бунга январь бошидан Трюдо Либерал ҳукумати томонидан АҚШ—Канада чегарасини кесиб ўтувчи юк машиналарининг эгаларидан вакцинация сертификати талаб қилинаётгани сабаб бўлган. Трюдо Оттавадаги намойишчиларни «озчилик гуруҳ» деб атади. Унинг сўзларига кўра, кўчага чиққанлар канадаликларнинг позициясини ифодаламайди.
30 январь куни Канада бўйлаб минглаб одамлар юк машиналари колонналарида Канада пойтахтига етиб келган. Расмийлар Оттавага келаётган юк ташувчилар сони дам олиш кунлари 10 мингга етишини прогноз қилмоқда.
Изоҳ (0)