Қозоғистон президенти Қосим-Жўмарт Тўқаев президент лавозимда икки муддатдан ортиқ қолиш нияти йўқлигини маълум қилди.
«Қанча вақт Қозоғистон президенти бўлишимни билмайман, лекин бир нарса аниқки, Конституцияга мувофиқ икки муддатдан ортиқ (президент — таҳ.) бўлмайман. Яъни қонунлар, айниқса, Конституция қайта ёзилмайди», — деди Тўқаев «Хабар 24» давлат телеканалига берган интервьюсида.
Қозоғистон раҳбари унинг президент сифатидаги вазифаси бутун жамият, сиёсий тизим ва иқтисодиётни тубдан ўзгартиришда ижобий натижаларга эришиш эканини таъкидлади. У, шунингдек, республикада парламент тизимини ислоҳ қилиш тўғрисида жиддий бош қотираётганини айтди.
«Айтишим мумкинки, мамлакатимиздаги парламент тизимини ва албатта, партия тизимини ислоҳ қилиш ҳақида жиддий ўйлаяпман. Чунки 28 январь куни Нур Отан партияси қурултойида давлат раҳбари сифатида бу ҳақда айтганимдек, мен барча жамоат, партия ва сиёсий тузилмалардан юқори туришим зарур, деб ҳисоблайман. Бу турли ижтимоий-сиёсий кучларни давлатимиз манфаатларидан келиб чиқадиган позицияси бўйича умумий махражга олиб келиш учун ўзига хос магнит бўлиб хизмат қилади», — дея тушунтирди у.
Қозоғистон президенти Республика Хавфсизлик кенгашига раисликни ўз зиммасига олиш масаласи қандай ҳал қилингани тўғрисида ҳам гапирди.
«(Январь тартибсизликлари пайтида – таҳ.) Хавфсизлик кенгаши раислигини зудлик билан ҳал қилиш кераклиги тўғрисида музокара бўлди, ўшанда вазият кескинлашаётган эди: яширмайман, ўша пайтда ҳозир халққа мурожаат қилиб, бундан буён Хавфсизлик кенгашининг раиси мен эканимни айтишим зарурлиги масаласини ўзим кўтардим. Бу масала том маънода йўл-йўлакай ҳал қилинди», — деди у.
Шунингдек, Тўқаев Қозоғистон биринчи президенти Нурсултон Назарбоев билан ҳокимиятни бўлиб олиш устида савдолашмагани ҳақида гапирди.
«Ҳеч қандай савдолашув бўлгани йўқ. Шахсий имтиёзлар ҳақида гап бўлмади. Гап фақат Хавфсизлик кенгашидаги мақом ҳақида эди», — дея таъкидлади давлат раҳбари.
Мавзуга доир: Назарбоев Нур-Султонда қолган ва Тўқаев билан активларни бўлишиб олиш ҳақида музокаралар олиб бормоқда — The Guardian
Тартибсизликлар фонида Тўқаев Назарбоевнинг ўрнига Хавфсизлик кенгаши раҳбари ваколатларини зиммасига олди. Назарбоев матбуот котибининг айтишича, у ушбу лавозимини амалдаги президентга ўз ихтиёри билан топширган.
28 январь куни эса Тўқаев Қозоғистондаги ҳукмрон Нур Отан партиясининг раиси этиб сайланди. Мазкур сиёсий уюшма ташкил этилган 1999 йилдан буён унга Назарбоев раҳбарлик қилиб келаётганди.
Аввалроқ Назарбоев амалдаги президент «бутун ҳокимиятга эга» экани ва Қозоғистон сиёсий элитасида ҳеч қандай зиддият йўқлиги ҳақида гапирганди.
27 январь куни Қозоғистон Сенати Назарбоевга тегишли бўлган элбоши мақомини ўзгартириш ташаббуси билан чиқди. Мамлакат Сенати ички ва ташқи сиёсатнинг асосий йўналишларини энди биринчи президент билан мувофиқлаштирмасликни таклиф қилган. Ҳозирда Назарбоев республика Конституциявий Кенгашига кириш ҳуқуқини сақлаб қолмоқда.
Изоҳ (0)