Исроил президенти Исхак Герцог ва унинг рафиқаси 30 январь куни Бирлашган Араб Амирликларига (БАА) биринчи расмий ташриф билан учиб кетди. Бу ҳақда президент идорасига таяниб, «ТАСС» хабар берди.
«Тарихда биринчи марта президент Герцог БААнинг амалдаги ҳукмдори ва Абу-Даби валиаҳд шаҳзодаси Муҳаммад бин Заид Ал Наҳаённинг таклифига биноан бугун (30 январь) эрталаб президентлик ташрифи учун БААга кетди. Президент Абу-Даби ва Дубайга ташриф буюриб, Абу-Даби валиаҳд шаҳзодаси, БАА ташқи ишлар ва халқаро ҳамкорлик вазири Шайх Абдулла бин Заид Ал Наҳаён ҳамда БАА вице-президенти, бош вазири, Дубай амири Муҳаммад бин Рашид Ал Мактум билан расмий учрашувлар ўтказади», — дейилади баёнотда.
Герцог сафар олдидан таъкидлаганидек, унинг 31 январгача давом этадиган ташрифи 2020 йилнинг сентябрь ойида Вашингтонда Исроил томони АҚШнинг фаол воситачилигида БАА ва Баҳрайн билан муносабатларни нормаллаштириш бўйича имзолаган ҳужжатлари туфайли амалга ошмоқда. «Иброҳим келишуви» деб номланувчи мазкур уч томонлама келишувдан олдин Исроил фақат Миср ва Иордания билан дипломатик муносабатларга эга эди.
Ташриф давомида Герцог БААдаги ЭХПО халқаро кўргазмасида Исроил кунини ҳам очиб беради.
«Ўзим билан бутун минтақага тинчлик хабарини олиб келаман. Тинчлик эса ўз ортидан минтақа халқлари манфаати учун фаровонлик, тараққиёт ва ўсишни етаклаб келади», — дея Герцогнинг баёнотидан иқтибос келтиради президент идораси.
2021 йилнинг март ойида тарихда биринчи марта БАА элчиси Исроилнинг Тель-Авив шаҳрига ташриф буюрганди. 14 июль куни эса БАА Тель-Авив шаҳрида ўз элчихонасини расман очди. Ўша йилнинг июнь ойи охирида Абу-Дабида Исроил элчихонаси очилганди.
Изоҳ (0)