АҚШда қор довули сабаб 5 мингга яқин авиарейс бекор қилинди

29 январь куни АҚШга ёпирилиши кутилаётган қор довули сабаб 5 мингга яқин авиарейс бекор қилинди, деб хабар беради Reuters.

АҚШ Миллий метеорология хизматининг маълум қилишича, довул хавфли бўронга айланиши мумкин ва парвозларни амалга ошириш «деярли имконсиз».

FlightAware маълумотларига кўра, 28 январдан 30 январга қадар 4,9 мингга яқин рейс бекор қилинган. Авиапарвозларнинг асосий қисми Нью-Йорк, Бостон, Ньюарк ва Филадельфия аэропортлари ҳисобига тўғри келади.

Метеорология хизматининг огоҳлантиришича, мамлакатнинг шарқий қирғоқларига кучли шамол кузатилиб, қор ёғади.

Эслатиб ўтамиз, 2021 йилнинг 29 август куни Мексика кўрфази соҳилига «Ида» довули кириб келганди. Дастлаб, шамол тезлиги соатига 240 километрга етган, довулга хавфлилик даражаси бўйича бешта тоифанинг тўртинчиси берилган. Табиий офат туфайли АҚШнинг Луизиана штатида 1 миллиондан ортиқ аҳоли электр энергиясидан узилиб қолган, бир киши вафот этган. Кейин довул Миссисипи, Теннесси ҳудудларидан ўтиб, Виржиния, Мериленд, Пенсильвания, Нью-Йорк ва Нью-Жерси штатларини қамраб олган эди. Бир кун олдин табиий офат қурбонлари сони 20 тага етгани хабар қилинганди. Сентябрь бошларига келиб эса АҚШда «Ида» довули қурбонлари сони 42 кишига етган, мамлакатда стратегик нефть захирасидан фойдаланиш бошланган.