AQShda qor dovuli sabab 5 mingga yaqin aviareys bekor qilindi

29-yanvar kuni AQShga yopirilishi kutilayotgan qor dovuli sabab 5 mingga yaqin aviareys bekor qilindi, deb xabar beradi Reuters.

AQSh Milliy meteorologiya xizmatining ma’lum qilishicha, dovul xavfli bo‘ronga aylanishi mumkin va parvozlarni amalga oshirish “deyarli imkonsiz”.

FlightAware ma’lumotlariga ko‘ra, 28-yanvardan 30-yanvarga qadar 4,9 mingga yaqin reys bekor qilingan. Aviaparvozlarning asosiy qismi Nyu-York, Boston, Nyuark va Filadelfiya aeroportlari hisobiga to‘g‘ri keladi.

Meteorologiya xizmatining ogohlantirishicha, mamlakatning sharqiy qirg‘oqlariga kuchli shamol kuzatilib, qor yog‘adi.

Eslatib o‘tamiz, 2021-yilning 29-avgust kuni Meksika ko‘rfazi sohiliga “Ida” dovuli kirib kelgandi. Dastlab, shamol tezligi soatiga 240 kilometrga yetgan, dovulga xavflilik darajasi bo‘yicha beshta toifaning to‘rtinchisi berilgan. Tabiiy ofat tufayli AQShning Luiziana shtatida 1 milliondan ortiq aholi elektr energiyasidan uzilib qolgan, bir kishi vafot etgan. Keyin dovul Missisipi, Tennessi hududlaridan o‘tib, Virjiniya, Merilend, Pensilvaniya, Nyu-York va Nyu-Jersi shtatlarini qamrab olgan edi. Bir kun oldin tabiiy ofat qurbonlari soni 20 taga yetgani xabar qilingandi. Sentabr boshlariga kelib esa AQShda “Ida” dovuli qurbonlari soni 42 kishiga yetgan, mamlakatda strategik neft zaxirasidan foydalanish boshlangan.