Россия Украинага ҳужум қилишга тайёр, бироқ ҳали буни амалга ошириш бўйича қарор қабул қилмаган. Бу ҳақда Германия Федерал разведка хизмати (BND) раҳбари Бруно Кал Reuters’га берган интервьюсида маълум қилди.
«Мен ҳужум бўйича қарор ҳали қабул қилинмаган деб ҳисоблайман. Инқироз минглаб усуллар билан ривожланиши мумкин», — дейди у. Кал Россия «босқини» юз берган тақдирда қандай санкциялар қўлланилиши тўғрисидаги саволга жавоб беришни истамаган, бироқ Москвани имкон қадар чекловчи чоралар билан узоқда ушлаб туриш бўйича Германия ёндашувини қўллаб-қувватлаган.
Ғарб Россияга Украинага нисбатан «босқинчлик» ҳаракатларини тайёрлаётганини таъкидлаб келмоқда. Январь ўрталарида Оқ уй матбуот котиби Жен Псаки Россия Украинага бостириб кириш учун асос яратаётганини маълум қилганди. Унинг сўзларига кўра, январь февраль ойларида содир бўлиши мумкин, тажовузкор ҳаракатлар учун сабаб уюштирилади.
Москва бу маълумотларни рад этиб, Украинадаги ҳарбий ҳаракатларга тайёргарлик ҳақидаги хабарларни «қуруқ, асоссиз кескинлик» деб атамоқда. Қолаверса, Россия ғарб давлатларидан НАТОнинг шарққа томон кенгаймаслиги, Украина эса бу ташкилотга қабул қилинмаслиги ҳақида кафолат талаб қилган.
Аввалроқ Зеленский АҚШ давлат котиби билан учрашувда Украина армиясини модернизация қилишда ёрдам сўрагани, Канада махсус кучларининг бир қисми Украинага жўнатилгани тўғрисида хабар берилганди. Шунингдек, НАТО Украина яқинида Россия кучлари тўпланаётгани сабаб ўз қуролли кучларини жанговар шай ҳолатга келтираётгани ва Шарқий Европага қўшимча кема ҳамда қирувчи самолётларни юборгани маълум бўлганди.
Изоҳ (0)