Фото: Қашқадарёдаги кучли шамол ҳокимият биноси ва бозор томига зарар етказди

Қашқадарё вилоятида давом этаётган кучли шамол Нишон тумани ҳокимлиги биносига ҳам зарар етказди, дея хабар берди «Дарё» мухбири.

Қайд этилишича, кучли шамол ҳокимлик биносининг орқа, том қисми томонидаги қурилиш материалларини учириб юборган. Туман ҳокимлиги ахборот хизмати раҳбари Ихтиёр Умаров ҳолатни тасдиқлади. Унинг айтишича, ҳокимият биноси таъмири давом этаётган бўлган.

Шунингдек, Қашқадарё вилояти, хусусан, Қарши шаҳрида 28 январь куни эсган кучли шамол шаҳар марказидаги бозор томига ҳам зарар етказди. Бу ҳақда «Дарё»га вилоят Фавқулодда вазиятлар бошқармаси ахборот хизмати раҳбари Соҳиб Ваитов хабар берди.

Қайд этилишича, кучли шамол оқибатида бозор томи учиб, юк автомобили устига тушган.

«Ҳайриятки, ушбу транспорт воситаси ва ҳайдовчиси ҳамда бино атрофидаги йўловчи фуқароларга ҳеч қандай тан жароҳати етмаган», — дейди Соҳиб Ваитов.

Қўшимча қилинишича, воқеа ҳақида 28 январь куни соат 14:20 да вилоят ФВБнинг 1050 қисқа рақами орқали хабар келиб тушган.

«Қарши шаҳридаги ‘Оқтепа экў бозорининг том ёпмаси кучли шамол таъсирида қулагани тўғрисидаги хабарни олганимиздан сўнг, айтилган манзилга қутқарув хизматидан 2 та бўлинма жалб этилди. Ҳозирда қутқарувчилар томонидан вазият оқибатлари бартараф этилмоқда», — дейди бошқарма масъули.

Маълум бўлишича, бинонинг 450 метр/квадрат том қисми зарар кўрган ва бино ёнида бўлган юк автомобили устига том ёпма конструкцияси қулаб тушган.

Аввалроқ «Ўзгидромет» Ўзбекистон ҳудудига 28—29 январь кунлари Эрон ҳудудларидан Каспий денгизи ва Туркманистон орқали нам ва салқин ҳаво массаси кириб келиши кутилаётганини, шу сабаб республиканинг бир қатор ҳудудлари, жумладан, Қашқадарё вилоятида шамол 17-22 метр/секундгача, айрим жойларда 25-28 метр/секундгача кучайиши мумкинлигини хабар қилганди.

Шу куни кучайган шамол таъсирида Қарши шаҳри марказида жойлашган катта экран қулаб тушган.

Энергетика вазирлиги ахборотига кўра, кучли шамол кузатилаётгани сабабли Қашқадарё вилояти туман ва шаҳарларининг айрим ҳудудларида электр энергияси таъминотида узилиш бўлмоқда. Шу сабабли хавфсизликни таъминлаш мақсадида электр тармоқлари вақтинчалик тармоқдан ажратилган.

Вазирлик ҳудудда кучли шамол эсиши пасайгандан сўнг электр энергияси қайта тармоққа уланишини билдириб, келтирилган ноқулайликлар учун истеъмолчилардан узр сўради.