НАТО Россиянинг хавфсизлик кафолатлари бўйича таклифларига ёзма равишда жавоб қайтарди. Бу ҳақда НАТО бош котиби Йенс Столтенберг Брюсселдаги матбуот анжуманида маълум қилди.
Унинг сўзларига кўра, Россиянинг таклифларига ёзма жавоб 26 январь куни АҚШ билан параллел равишда топширилган. Россияга жавоб хати тўғрисида НАТО бош котиби қуйидагиларни гапирди:
НАТОнинг хавфсизлик кафолатлари бўйича жавоби альянснинг барча 30 аъзоси томонидан қўллаб-қувватланди. Биз асосий тамойилларимиз, жумладан, очиқ эшиклар сиёсати ва суверен мамлакатларнинг НАТОга кириш ҳуқуқини ўзгартириш бўйича муросага тайёр эмасмиз. Аммо Россия билан гаплашишга, унинг хавотирларини тинглашга тайёрмиз, буни қанча тез бошласак, шунча яхши. Биз Москва ва Брюсселдаги ваколатхоналарни тиклашни, шунингдек, тўғридан-тўғри алоқа линиясини ташкиллаштиришни таклиф қиламиз.
Қуролларни назорат қилиш бўйича кенг кўламли мулоқот бошлашни зарур деб ҳисоблаймиз. Аммо Россия ўзининг агрессив сиёсатидан воз кечиб, қўшинларини Грузия, Украина ва Молдовадан олиб чиқиши керак, қўшинлар ушбу давлатлар ҳукуматларининг розилигисиз жойлаштирилмоқда. Мавжуд вазиятдан келиб чиқиб, кучларимизнинг тайёргарлик даражасини оширдик ва Болтиқбўйи, Қора денгиз минтақаларида ўз иштирокимизни кучайтирмоқдамиз.
Бизда бир қатор асосий тамойиллар мавжудки, уларни ҳимоя қилишга доим тайёрмиз. Бунга Украина суверенитети ва унинг ҳудудий яхлитлигини сақлаш киради. Шунингдек, ҳар бир давлатнинг ўз иттифоқчиларини ўзи танлаш ҳуқуқи ҳам. Биз мулоқотга очиқмиз ва дипломатияни афзал кўрамиз, лекин Россия кескинликни пасайтириши керак. НАТО очиқ эшиклар тамойилига амал қилади. Бизнинг позициямиз Европа иттифоқчилари ва Украина билан келишилган. Воқеалар қандай ривожланишини Россия ҳал қилади. Биз ҳар қандай сценарийга тайёрмиз. Россиянинг таклифларига берган жавобимиз матнини эълон қилмаяпмиз, чунки дипломатия муваффақияти учун махфий музокаралар зарур. Умид қиламизки, Россия ҳам шундай фикрда.
Аввалроқ НАТО Бош котиби альянс ҳеч қачон шарққа томон кенгаймаслик мажбуриятини олмаганини айтганди. Шунингдек, у Украинанинг альянсга аъзолиги масаласида Россия билан муроса қилиш имкониятини ҳам истисно қилган.
Изоҳ (0)