Барча иқтисодий комплекс раҳбарлари ва ҳокимларнинг келгуси беш йилдаги энг устувор вазифаси – ялпи ички маҳсулотни 100 миллиард доллардан ошириб, саноат маҳсулотлари ишлаб чиқаришни 1,4 бараварга кўпайтириш ва камбағаллик даражасини камида 2 бараварга қисқартиришдан иборат бўлиши зарур. Бу ҳақда Президент Шавкат Мирзиёев бошчилигида ўтказилаётган йиғилишда маълум қилинди, дея хабар қилмоқда «Дарё» мухбири.

Молия вазирлиги ва Марказий банк 2022 йилда инфляция даражасини 9 фоиздан оширмаслик бўйича барча зарурий чораларни кўриши лозимлиги таъкидланди.

Шу билан бирга, 2022 йилда оилавий тадбиркорлик дастурлари доирасида 10 триллион сўм кредитларни «маҳаллабай» кафолатли манзилларга етиб боришини таъминлаш кераклигни қайд этди.

Молия вазирлиги ва Марказий банк бюджет тақчиллигини ялпи ички маҳсулотга нисбатан 3 фоиздан оширмаслиги шартлиги белгиланди.

Масъуллар янги ерларни ўзлаштириш, сув тежовчи ва рақамли технологияларни жорий қилиш, илм-фан ва инновациялар орқали, деҳқон ва фермерлар даромадини камида 2 бараварга ошириб, аграр тармоқда йиллик ўсишни камида 5 фоизга етказиши лозимлиги бўйича топшириқ берилди.

Ташқи савдо ва инвестициялар вазирлигига тармоқ ва ҳудуд раҳбарлари билан бирга, иқтисодиётга беш йилда 120 миллиард доллар, шу жумладан, 70 миллиард доллар хорижий инвестициялар жалб этиш, экспорт ҳажмини йилига 30 миллиард доллардан ошириши шарт.

«Тасаввур қилинг, бу қандай рақам?! Инвесторларни ишонтирдик, қанчаси келиб бизга хайрихоҳлик билдирмоқда», – дейди президент.

Давлат раҳбари масъулларга нефть-кимё саноатини ривожлантириш бўйича алоҳида топшириқ берди.

«Кўряпсизларми, биз ўз олдимизга қандай улуғвор марраларни қўймоқдамиз. Энг муҳими, бу улкан вазифаларни ҳамон давом этаётган пандемия ва глобал инқироз шароитида амалга оширишга тўғри келади. Бу биздан катта куч ва маблағ, юксак ирода ва қатъий интизомни, барча куч-имконият ва ресурсларимизни тўла сафарбар этишни талаб этади», – дейди Шавкат Мирзиёев.