Haydovchilik guvohnomasini olish uchun o‘qitish tizimi tubdan takomillashtiriladi. Bu haqda Shavkat Mirziyoyev 26-yanvar kuni bo‘lib o‘tgan selektor yig‘ilishida ma’lum qildi, deb xabar qilmoqda “Daryo” muxbiri.
“Koronavirusdan emas, avariyalar oqibatida ko‘p inson halok bo‘lmoqda. Ichki ishlar vazirigi hamda Transport vazirligi viloyat hokimlari bilan birga yo‘llarda xavfsiz harakatlanishga sharoit yaratish, avariya va o‘lim holatlarini keskin qisqartirish, buning uchun harakatlarni boshqarishni to‘liq raqamlashtirishi zarur.
Shu o‘rinda, bir muhim masalaga barchaning e’tiborini qaratmoqchiman. Umuman, haydovchilik guvohnomasini o‘qimasdan olish oddiy holga aylanib qoldi. Shuning uchun, ‘avariya’lar soni soat sayin oshib bormoqda. Men ham o‘qiganman, biz uch yil o‘qiganmiz. Hozirgilar o‘qimasdan olyapti. Nima O‘zbekistonda qonun yo‘qmi?”, — deydi Shavkat Mirziyoyev.
Prezident mas’ullarga bu kabi muammolarni bartaraf qilish uchun o‘qitish tizimini tubdan takomillashtirish borasida topshiriq berdi.
“O‘qitmasdan va o‘rgatmasdan guvohnoma berish jinoyatiga qarshi jazoni kuchaytirish bo‘yicha, bir oy muddatda qonunchilikka qo‘shimcha kiritish yuzasidan taklif kiritilsin”, — deya davlat rahbari Adliya vazirligiga topshiriq berdi.
“Mamlakatimizning hududiy yaxlitligi, sarhadlarimiz daxlsizligini ta’minlash muhim vazifa.
Hech kimga sir emas — bugun jamiyatda tinchlik va barqarorlikni saqlash, mustaqilligimizni mustahkamlash, mamlakatimizning hududiy yaxlitligi, sarhadlarimiz daxlsizligini ta’minlash eng muhim vazifa bo‘lib turibdi. Faqat samarali iqtisodiy islohotlargina mavjud ijtimoiy muammolarni yechish imkonini beradi”, — degan prezident.
Izoh (0)