Шавкат Мирзиёев бошчилигида ўтказилаётган йиғилишда «Давлат – инсон учун» ғоясини ҳаётга татбиқ этиш мақсадида 2022–2026 йилларга мўлжалланган Янги Ўзбекистоннинг тараққиёт стратегияси мазмунига тўхталиб ўтилди. Бу ҳақда «Дарё» мухбири хабар қилди.
Жумладан, ушбу стратегияда:
- яқин ва ўрта истиқболда Ўзбекистоннинг тараққиёт тенденциялари қандай бўлади?
- келгусидаги фаолиятимизни белгилайдиган айнан қайси мақсад ва вазифалар, биз учун энг долзарб ва устувор ҳисобланади?
- давлат ва жамият ҳаётининг барча жабҳа ва йўналишларини комплекс ривожлантириш учун асосий эътиборни нималарга қаратишимиз керак?
- кейинги йилларда қабул қилинган қонун ва қарорларимиз, дастур ва режаларимизни янги даврда қандай давом эттиришимиз, уларга қандай қўшимча ва ўзгартиришлар киритишимиз керак деган саволларга чуқур ва атрофлича жавоб берилгани қайд этилди.
Давлат раҳбари демократик ислоҳотларнинг узвийлиги ва давомийлигини таъминлаш мақсадида келгуси фаолият учун «Ҳаракатлар стратегиясидан – Тараққиёт стратегияси сари» деган принципни бош тамойил этиб белгиланганини билдирди. Шу асосда 2022 йил – «Инсон қадрини улуғлаш ва фаол маҳалла йили» бўйича давлат дастури тайёрланиб, кенг жамоатчилик муҳокамасидан ўтказилгани таъкидланди.
Албатта, инсон қадри биз учун қандайдир мавҳум, баландпарвоз тушунча эмас. Инсон қадри деганда, биз, аввало, ҳар бир фуқаронинг тинч ва хавфсиз ҳаёт кечиришини, унинг фундаментал ҳуқуқ ва эркинликларини таъминлашни назарда тутамиз», — дейди Мирзиёев.Инсон қадри деганда, президент ҳар бир фуқаро учун муносиб турмуш шароити ва замонавий инфратузилма ташкил этиш, малакали тиббий хизмат кўрсатиш, сифатли таълим, ижтимоий ҳимоя тизими, соғлом экологик муҳит яратиб бериш эканлигини маълум қилди.
Бу мақсадга эришиш учун эса дунёдаги ноёб демократик тузилма бўлган маҳалла институтининг катта имкониятларидан самарали фойдаланиш, унинг ваколатларини янада кенгайтириш, натижада маҳаллани жамиятнинг ҳал қилувчи бўғинига айлантириш вазифаси қўйилганини билдирди.
2022 йилга мўлжалланган Давлат дастури лойиҳасининг муҳокамаси фуқаролар билан «очиқ мулоқот» шаклида ўтказилиб, халқ томонидан кенг қўллаб-қувватлани, муҳокама жараёнида аҳолидан 17 мингдан зиёд таклифлар келиб тушгани айтилди.
Уларнинг барчаси йўналишлар бўйича ўрганилгани, бир-бирига яқин таклифлар умумлаштирилиб, Дастур лойиҳаси 300 дан ортиқ янги ташаббуслар билан тўлдирилгани маълум бўлди.
Фуқаролар билдирган:
- маҳаллаларда «Иш марказлари»ни ташкил этиш, маҳаллада ҳокимлар, сектор раҳбарларининг онлайн қабулини ўтказиш;
- давлат ва жамият ҳаётида фаол иштирок этган фуқароларни рағбатлантириш;
- ҳар бир маҳаллани ривожлантириш стратегиясини ишлаб чиқиш;
- аҳоли кайфиятини социологик сўровномалар орқали ўрганиб бориш;
- ёки узоқ ҳудудлардаги мактабларга автобус қатновини йўлга қўйиш каби таклифлар бизга айниқса маъқул бўлгани алоҳида қайд этилди.
Изоҳ (0)