Рамзан Қодиров Чеченистоннинг федерал марказдан ҳар йили оладиган ёрдамини 300 млрд рублга баҳолади. Бусиз минтақа бир ой ҳам яшай олмайди

Чеченистон ҳар йили федерал бюджетдан 300 миллиард рублга (3,8 миллиард доллар) яқин дотация (давлат томонидан бериладиган ёрдам пули) олади. Бу каби рақамларни республика раҳбари Рамзан Қодиров келтириб ўтган, деб хабар беради «РИА Новости».

Қодировнинг сўзларига кўра, ушбу ёрдамсиз республика «бир ой ҳам яшай олмайди». Чеченистон раҳбари, шунингдек, у ерда пул ишлаш мумкин бўлган табиий ресурслар йўқлигини маълум қилган.

«Ҳамма бизда нефть борлиги ҳақида гапиради. Илтимос, исталган кимнидир олиб келинг, биз нефтни қайта ишлаш заводларини қуришга тайёрмиз. Биз сизга исталган ҳудудни берамиз, нефть қазиб олиш имкониятини тақдим этамиз. Буларнинг ҳеч бири йўқ. Газимиз ҳам, светимиз ҳам, нефтимиз ҳам йўқ — буларнинг барчаси биз бирор нарса ҳақида ўйлашимиз учун ўйлаб топилган нарсалар», — дейди Чеченистон етакчиси.

Қодировнинг сўзларига кўра, етти йил давомида у минтақада нефтни қазиб олиш бўйича инвесторларни топишга уринган, аммо буни уддалай олмаган.