Ўзбекистон миллий терма жамоасининг БАА клубига қарши назорат ўйинида иштирок этиши расман тасдиқланди.
Ўзбекистон терма жамоаси 23 январь, якшанба куни Дубайда БААнинг «Ал-Ваҳда» клубига қарши ўртоқлик ўйинини ўтказиши ҳақида хабар берилганди. ЎФАнинг маълум қилишича, назорат ўйини иккала мураббийнинг талаби билан ёпиқ тарзда ўтади.
Мазкур йиғин доирасида Японияга қарши ўртоқлик ўйини ўтказилиши керак эди, бироқ коронавирус билан боғлиқ танг вазият туфайли Япония сўровига кўра 21 январь кунига белгиланган учрашув бекор қилинди. Шунингдек, йиғин доирасида 1 февраль куни Янги Зеландияга қарши ўртоқлик ўйини ўтказилади.
Терма жамоа бош мураббийи Сречко Катанец (шу сабабли у Словениядан Дубайга кела олмаган) ва Ҳожимат Эркиновда коронавирус аниқлангани ҳақида хабар берилганди. Кейинроқ Эркиновнинг соғайиб сафга қайтгани ва дарвозабон Умиджон Эргашевда коронавирус инфекцияси аниқлангани маълум қилинди. Қайд этиш керак, шундан кейин ЎФА Катанецнинг йиғинга келиб қўшилгани ёки аксинча эканлиги ҳақида хабар бермади.
Эслатиб ўтамиз, Ўзбекистон миллий терма жамоаси 2021 йилнинг сентябрь ойида Швецияга қарши ўртоқлик ўйини ўтказиб, 1:2 ҳисобида мағлуб бўлганди. Октябрь ойидаги ўртоқлик учрашувларида Малайзия (5:1) устидан ғалаба қозониб, Иорданияга қарши ўйинда (0:3) енгилди. Ноябрь ойида эса Грузияга кичик ҳисобда (0:1) мағлуб бўлди.
Изоҳ (0)