18-yanvar kuni Turkmaniston prezidenti Gurbanguli Berdimuhamedov Axal viloyatining yangi poytaxti qurilayotgan hududga tekshiruv bilan bordi, deb xabar beradi “Xronika Turkmenistana”. Biroq davlat rahbari undan oldin “yangi qulun tug‘ilgani haqidagi xushxabarni” eshitib, Xalqaro axaltaka ot sporti majmuasiga kirib o‘tgan.
Majmuada Berdimuhamedov yilqichilar bilan gaplashgan, ularning ulkan mehnati uchun minnatdorchilik bildirib, bosh yilqichining iltimosiga ko‘ra, yangi tug‘ilgan qulunga 2022-yil shiori — “Xalqning Arqadog‘ bilan davri” sharafiga “Zamon” laqabi berilgan.
Shu kuni Berdimuhammedovning farmoni bilan “otchilik komplekslarini modernizatsiya qilish, otlarni saqlash sharoitlarini va seleksiya ishlarini yanada yaxshilash, ot sporti va chavandozlik san’atini rivojlantirish uchun Barqarorlashtirish jamg‘armasidan mablag‘ ajratilgan.
Shundan so‘ng, Turkmaniston prezidenti Axal viloyatining yangi qurilayotgan ma’muriy markaziga tashrif buyurgan. Ta’kidlanishicha, “har jihatdan shaharsozlik dasturi talablariga to‘liq javob beradigan” yangi shaharni qurish ishlari 2019-yilda boshlangan.
Berdimuhamedov binolar qoplamalari va bordyurlarda ishlatiladigan materiallarni, shuningdek, o‘rindiqlar, chiqindi idishlari, yoritish ustunlari, stadionlardagi o‘rindiqlar, 40 metrli “Axal” monumenti, yerusti yo‘laklari, avtobus bekatlari dizaynini tasdiqlagan.
Davlat rahbari shundan so‘ng, shahar qurilishiga jalb etilgan kompaniyalar rahbarlari va qurilishga mas’ul bosh vazir o‘rinbosarlari ishtirokida yig‘ilish o‘tkazgan.
Yig‘ilish davomida yig‘ilganlarga yangi shaharda yuqori turmush darajasini ta’minlash, barcha qurilish ishlarini o‘z vaqtida yakunlash bo‘yicha topshiriq bergan. Qurilish ishlari uchun davlat rahbari mamlakatdagi oliy ta’lim muassasalarining talabalarini jalb etish bo‘yicha ko‘rsatma ham bergan.
Ma’lumot uchun, Axal viloyati Turkmaniston poytaxti — Ashxobod o‘zining boshqaruv organlari bilan alohida ma’muriy birlik bo‘lib ajralib chiqqach paydo bo‘lgan.
Izoh (0)