Ўзбекистон миллий терма жамоасининг яна бир футболчисида коронавирус аниқланди

Ўзбекистон миллий терма жамоасида коронавирус билан боғлиқ вазият борасида маълумот берилди.

Аввалроқ терма жамоа аъзоси Ҳожимат Эркиновда коронавирус аниқлангани борасида хабар берилганди. Футболчининг қайта топширган тести манфий чиқди ва у якка тартибда енгил машғулотларни бошлаб юборди.

Шунингдек, делегациянинг қолган аъзолари ҳам навбатдаги ПЗР тестларини топширди. Унга кўра, терма жамоа дарвозабони Умиджон Эргашевда коронавирус инфекцияси аниқланган. Айни пайтда футболчи ўзини яхши ҳис этяпти ва бошқа симптомлар кўзга ташланмаяпти. Эргашев бир неча кундан сўнг қайта тест топширади. Ҳозирда дарвозабон изоляцияга олинган.

Эслатиб ўтамиз, Ўзбекистон миллий терма жамоаси ҳозирда Дубайда йиғин ўтказмоқда. Мазкур йиғин доирасида Японияга қарши ўртоқлик ўйини ўтказилиши керак эди, бироқ коронавирус билан боғлиқ танг вазият туфайли Япония сўровига кўра 21 январь кунига белгиланган учрашув бекор қилинди.

Ўзбекистон миллий терма жамоаси сентябрь ойида Швецияга қарши ўртоқлик ўйини ўтказиб, 1:2 ҳисобида мағлуб бўлганди. Октябрь ойидаги ўртоқлик учрашувларида Малайзия (5:1) устидан ғалаба қозониб, Иорданияга қарши ўйинда (0:3) енгилди. Ноябрь ойида эса Грузияга кичик ҳисобда (0:1) мағлуб бўлди.