Париж ва Женевадаги америкалик дипломатлар «Гавана синдроми»дан шикоят қилди

АҚШнинг Париж ва Женевадаги дипломатик миссияларининг бир қанча ходимлари «Гавана синдроми» деб аталувчи касаллик – қулоқларда шовқин, бош оғриғи ва айланишидан шикоят қилди. Бу ҳақда The Wall Street Journal хабар берди.

Нашр маълумотларига кўра, Женевадаги дипломатик миссия ходимларидан бирини муолажа учун АҚШга олиб кетишга тўғри келган, жами уч кишида «Гавана синдроми» қайд этилган. Парижда эса бир нафар америкалик дипломатда ушбу касаллик белгилари кузатилган, деб ёзади WSJ.

АҚШ Давлат департаменти бу маълумотга расмий изоҳ бермаган.

2021 йилнинг августида Германияда икки америкалик амалдор ўзида «Гавана синдроми» белгилари пайдо бўлгач, тиббий ёрдамга мурожаат қилганди. Бу НАТО давлатларида ушбу синдром бўйича қайд этилган дастлабки ҳолат эди.

Америкалик дипломатлар орасида «Гавана синдроми»нинг биринчи ҳолатлари 2016 йилда Кубада қайд этилган. Ўшандан бери шунга ўхшаш ҳодисалар Ўзбекистон, Хитой, Россия ва Австриядаги дипломатларда аниқланди, деб ёзади WSJ. Польша, Грузия, Тайван ва Вашингтонда ҳам ушбу синдром бўйича тасдиқланмаган ҳолатлар бўлган.

АҚШ разведка агентликлари ҳужумлар ортида Россия ҳукумати туриши мумкин деб тахмин қилган. Москва воқеаларга алоқаси борлигини қатъиян рад этади.

Маълумот учун, 2016 йилдан бери дунёнинг турли мамлакатларида ўнлаб америкалик давлат хизматчилари дуч келган ва аниқ тушунтириб берилмаган симптомларни ОАВ «Гавана синдроми» деб атайди. Бу симптомлардан Гаванадаги АҚШ элчихонаси ходимлари биринчи марта шикоят қилган. Улар қулоқларда шовқин ва оғриқ ҳамда бош айланиши ҳақида маълум қилган.