Tesla va SpaceX rahbari Ilon Mask ruhiy buzilish — Asperger sindromidan aziyat chekishini ma’lum qildi. Amerikalik tadbirkor bu haqda NBC telekanalida Saturday Night Live musiqiy komediya shousiga boshlovchilik qilgan payti aytib o‘tdi, deb yozadi “RBK”.

Foto: Reuters

“Men Saturday Night Live shousiga boshlovchilik qilish sharafiga muyassar bo‘ldim. Bugungi chiqishim tarixiy ahamiyatga ega, chunki men ushbu dasturning Asperger sindromiga ega birinchi boshlovchisi bo‘laman. Hech bo‘lmaganda buni tan olganlarning birinchisiga aylanaman”, — dedi Mask.

Biznesmen kirish nutqida o‘zining Twitter’da tez-tez noaniq narsalar yozib turishini aytib hazillashdi.

“Ammo miyam shu tarzda ishlaydi-da. Men elektromobillarni qayta ixtiro qildim va odamlarni kosmik kemada Marsga jo‘natyapman. Shuncha ishlarga qaramay siz meni oddiygina vazmin odam deb o‘ylaganmidingiz?” — dedi Mask.

Asperger sindromi — bu ruhiy kasallik, unga chalingan odamlar ijtimoiy muloqotda, atrofdagi dunyoni idrok etishda qiyinchilikka duch keladi. Stereotipik, takrorlanuvchi qiziqish va faoliyatlar majmuasi shu bilan tavsiflanadi.

“Ilon Mask: Tesla, Space X va kelajakka yo‘l” tarjimayi holi muallifi Eshli Vens “Maskka ruhiy buzilish yorlig‘ini yopishtirish, uni mas’uliyatsiz deyish kabi oson” deb yozgan.

Yozuvchining ta’kidlashicha, unga Maskning xatti-harakatlaridagi ba’zi  “g‘alati holatlar” haqida, masalan, “xo‘jayinining hayratlanarli darajada befarqligi”, “kurakda turmas haqoratlari” shuningdek, Maskning elektron pochta xabaridagi xatolardan g‘azablanish odati haqida gapirib berishgan.

Biroq Vensning so‘zlariga ko‘ra, tadbirkor “ahmoqlar va quruq gaplarga toqat qilmasligi” sababli shunday qiladi, shu bilan birga u do‘stlari va qarindoshlari davrasida o‘zini quvnoq va o‘ta hissiy tutadi.

Maskning o‘zi hazil deb ataydigan tvitlari bozorlarga jiddiy ta’sir ko‘rsatmoqda. Yil boshidan beri Maskning mikrobloglar xizmatidagi faolligi bitkoin narxi, Etsy onlayn bozori, Signal messenjeri, CD Project va GameStop videoo‘yin aksiyalari qiymatining oshishiga olib keldi. Ikki kun oldin ham ishbilarmon Twitter’da siba-inu zotli kuchukchasiga qarayotganini aytdi. Shundan so‘ng Shiba Inu nomli kriptovalyuta narxi bir soat ichida 68 foizga ko‘tarildi.