АҚШ Сенатидаги демократлар вазиятга гипотетик жиҳатдан ёндашиб, Россия Украинага ҳужум қиладиган бўлса, у ҳолда Москвага қарши янги санкциялар пакетини тайёрлаб қўйди. Бу ҳақда The Washington Post қонун лойиҳасига асосланиб хабар берди.
Газетанинг ахборотига кўра, чекловлар Россия ҳарбийлари, асосий банк муассасалари, шунингдек, ҳукумат амалдорлари ҳамда мамлакат президенти Владимир Путинга нисбатан жорий қилинади, дейилади мақолада.
Бундан ташқари, Россия Украинага ҳужум қиладиган бўлса, хавфсиз ахборот алмашинуви тизимларини таклиф қилувчи, SWIFT аналоглари бўлган Россия компанияларига ҳам санкциялар қўлланилади.
8 январда The New York Times Вашингтоннинг АҚШда ишлаб чиқарилган ҳар қандай электроника маҳсулотини Россияга экспорт қилишига тақиқ қўйиши мумкинлигини хабар қилганди. Нашрнинг ёзишича, мазкур чеклов чип ёки микрочип жойлаштириладиган ҳар қандай турдаги маҳсулотга, музлаткич, кир ювиш машинаси, мобил телефон ҳамда ноутбукларга нисбатан ҳам қўлланилиши мумкин.
Шунингдек, 2021 йил декабрь ойида CNN ва Bloomberg АҚШ Россияга қарши «тажовузкор» иқтисодий санкциялар пакети бўйича музокаралар олиб бораётгани, потенциал санкциялар пакети Россия президенти Владимир Путиннинг атрофидагилар, россиялик олигархлар, банклар ва энергетика компанияларига қарши чораларни ўз ичига олгани ҳақида хабар берган.
Изоҳ (0)