Бухорода шифокор фуқарони ҳамшираликка ишга жойлаштириш эвазига ундан 1000 доллар пора олаётганда ушланди. Бу ҳақда вилоят ИИБ ахборот хизмати раҳбари Шуҳрат Жалолов «Дарё»га маълум қилди.
Қайд этилишича, РШТЁИМ Бухоро филиалининг узоқ йиллик тажрибага эга шифокори Р.Х. фуқаро Н.Н.ни ваколатли танишлари орқали филиалга ҳамширалик ишига киритиш эвазига ундан 1000 доллар пора талаб қилган.
Фуқаро аризасига кўра 9 январда вилоят ИИБ ҳамда департаментнинг вилоят бошқармаси ходимлари томонидан тезкор тадбир ўтказилган ва шифокот тиббий муассаса яқинидаги ҳудудда кимёвий ишлов берилган 1000 долларни фуқаро Н.Н.дан олаётганида қўлга олинган.
Айни дамда ҳолат юзасидан Жиноят кодексининг 168-моддаси (фирибгарлик) 1-қисми ва 211-моддаси (пора бериш) 1-қисми билан жиноят иши қўзғатилган.
Эслатиб ўтамиз, Бухорода шундай ҳолат 2021 йилнинг октябрида ҳам юз берганди. Шаҳардаги 3-сон поликлиника бош шифокори фуқарони ҳамшираликка ишга жойлаштириш эвазига аёлдан 600 доллар олаётганида қўлга олинган.
Ўша йилнинг декабрида Ромитан туманидаги кўп тармоқли марказий поликлиникада фаолият юритиб келаётган шифокор ногиронлик нафақасини расмийлаштириб бериш эвазига фуқародан 500 доллар олганида ушланганди.
Изоҳ (0)