Абдулазиз Комилов 11 январь куни видеоконференцалоқа шаклида Туркий давлатлар ташкилоти ташқи ишлар вазирлари кенгашининг навбатдан ташқари йиғилишида иштирок этди. Бу ҳақда Ташқи ишлар вазирлиги хабар қилди.
Қайд этилишича, Озарбайжон, Қирғизистон, Қозоғистон, Туркия, Ўзбекистон, Венгрия ва Туркманистон ташқи ишлар вазирликлари раҳбарлари Қозоғистондаги мавжуд вазиятни муҳокама қилган.
Ташкилот аъзоларининг Қозоғистон халқи ва раҳбариятини қатъий қўллаб-қувватлаши ва бирдамлиги таъкидланган. Тез орада мамлакатда тинчлик ва барқарорлик ўрнатилишига ишонч билдирилган.
Йиғилиш якунлари бўйича қўшма баёнот қабул қилинган.
Маълумот учун, Қозоғистондаги вазият 2 январь куни Жанаўзен шаҳрида (Манғистов вилоятидаги шаҳар) суюлтирилган газ нархининг икки баравар ошишига қарши митинглар бошланганидан сўнг кескинлашди. Чиқишлар иқтисодий ва сиёсий талаблар билан бутун мамлакат бўйлаб оммавий норозилик намойишларига айланиб кетди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди. Қозоғистон президенти Қосим-Жўмарт Тўқаев мамлакатдаги оммавий тартибсизликлар пайтида ҳалок бўлганлар ва жароҳатланганлар борлигини айтган.
6 январда Коллектив хавфсизлик шартномаси ташкилоти (КХШТ) тинчликпарвар кучлари Қозоғистонга жўнатди. 7 январда Тўқаев Қозоғистонда конституциявий тартиб тикланганини эълон қилди ва мамлакат бўйлаб террорчилик хавфининг юқори даражаси жорий этилди. Қозоғистон ИИВ 4000 нафарга яқин террорчи ҳибсга олинганини маълум қилди
Аввалроқ Шавкат Мирзиёев Туркия президенти Ражаб Тоййиб Эрдўғон, Қосим-Жўмарт Тўқаев ва Эмомали Раҳмон билан телефон орқали мулоқот қилиб, Қозоғистондаги вазиятни муҳокама қилганди.
Изоҳ (0)