Buxoroda shifokor fuqaroni hamshiralikka ishga joylashtirish evaziga undan 1000 dollar pora olayotganda ushlandi. Bu haqda viloyat IIB axborot xizmati rahbari Shuhrat Jalolov “Daryo”ga ma’lum qildi.
Qayd etilishicha, RShTYoIM Buxoro filialining uzoq yillik tajribaga ega shifokori R.X. fuqaro N.N.ni vakolatli tanishlari orqali filialga hamshiralik ishiga kiritish evaziga undan 1000 dollar pora talab qilgan.
Fuqaro arizasiga ko‘ra 9-yanvarda viloyat IIB hamda departamentning viloyat boshqarmasi xodimlari tomonidan tezkor tadbir o‘tkazilgan va shifokot tibbiy muassasa yaqinidagi hududda kimyoviy ishlov berilgan 1000 dollarni fuqaro N.N.dan olayotganida qo‘lga olingan.
Ayni damda holat yuzasidan Jinoyat kodeksining 168-moddasi (firibgarlik) 1-qismi va 211-moddasi (pora berish) 1-qismi bilan jinoyat ishi qo‘zg‘atilgan.
Eslatib o‘tamiz, Buxoroda shunday holat 2021-yilning oktabrida ham yuz bergandi. Shahardagi 3-son poliklinika bosh shifokori fuqaroni hamshiralikka ishga joylashtirish evaziga ayoldan 600 dollar olayotganida qo‘lga olingan.
O‘sha yilning dekabrida Romitan tumanidagi ko‘p tarmoqli markaziy poliklinikada faoliyat yuritib kelayotgan shifokor nogironlik nafaqasini rasmiylashtirib berish evaziga fuqarodan 500 dollar olganida ushlangandi.
Izoh (0)