Қашқадарёда таниш аёлга тегишли видеоларни тарқатмаслик учун пул талаб қилган блогер иши судда кўриб чиқилмоқда

Жиноят ишлари бўйича Қашқадарё вилоят судида ўзини блогер сифатида таништириб, тасвирга олган видеосини интернетда тарқатмаслик эвазига икки миллион сўм пул талаб қилган блогер иши кўриб чиқилмоқда. Бу ҳақда судда қатнашган «Дарё» мухбири хабар берди.

Суд мажлисида маълум қилинишича, ўзини блогер сифатида таништирган М.Р. танишининг илтимосига кўра, унинг турмуш ўртоғига тегишли видеоларни YouTube ҳамда TikTok ижтимоий тармоғида тарқатган. Бу эса аёлнинг шаънини топтаган. Шундан сўнг жабрланувчи аёл Й.И. судга даъво киритиб, айбдор блогерга чора кўрилишини сўраган.

Дастлабки суд жараёни ва тайинланган жазога эътироз билдирган М.Р. белгиланган муддатда юқори инстанцияга шикоят қилган. Мазкур шикоят аризаси 2022 йилнинг 7 январь кунидан бошлаб судья Бурҳон Турдиев раислигида кўриб чиқилмоқда.

Суд терговида сўз олган айбланувчи блогер қилмишидан пушаймонлигини, жабрланувчининг видеосини ўзи тасвирга олмаганини, унга видеотасвирларни жабрланувчининг турмуш ўртоғи бериб, интернетда тарқатишни илтимос қилганини айтди. Шунингдек, биринчи инстанция қароридан норозилигини, унга имкон берилса, ижтимоий тармоққа чиқарган видеосини ўчириб ташлаб, обуначиларига хато қилганини айтиб, видеомурожаат қилишини маълум қилди. Жабрланувчи Й.И. эса бунга ҳожат йўқлигини, видео интернетда тарқалиб улгурганини, энди айбдор қилмишига яраша жазо олишини хоҳлаётганини таъкидлади.

Суд номаълум муддатга танаффус эълон қилди.

Эслатиб ўтамиз, вилоят ИИБ ахборот хизматининг 2021 йилнинг 1 июнь куни тарқатган расмий маълумотида ўзини М. блогер сифатида таништирган фуқаро ўзга шахсларга тегишли видеони интернетда тарқатиб юбормаслик эвазига 2 миллион сўм талаб қилгани маълум қилинганди.

«Фуқаро С.С. ариза билан мурожаат қилиб, 2021 йил 25 май куни кеч соат 21:00 да Нишон тумани Нуристон маҳалласида яшовчи таниши О. исмли аёлнинг уйига боргани, шу куни кеч соат 03:30 да нотаниш икки нафар фуқаро хонадонга бостириб кириб, улардан бири ўзини ‘М. блогер’ деб таништириб, унга ‘ушбу хонадонга нима сабабдан келгансан?’, деб урганини маълум қилган. Шунингдек, телефон аппаратида видеотасвирга олганини ва уни ижтимоий тармоқларда чиқариб юбориб шарманда қилишини айтиб, видеотасвирни тарқатмаслик эвазига ундан 2 миллион сўм пул талаб қилиб келган», — дейилади вилоят ИИБ ахборот хизмати тарқатган маълумотда.

Вилоят ИИБнинг қўшимча қилишича, судда иши кўриб чиқилаётган М. исмли шахс талаб қилинган пулнинг бир миллион сўмини олган вақтида ушланган. Ва унга нисбатан Нишон туман ИИБ ҳузуридаги тергов бўлинмаси томонидан Жиноят кодексининг 165-моддаси 1-қисми (товламачилик) билан жиноят иши қўзғатилиб, қамоқ эҳтиёт чораси қўлланилган.